23 чэрвеня, Масква /Эдуард Півавар - БЕЛТА/. У Расіі няма алергіі і рэўнасці да працэсу збліжэння Беларусі і ЕС. Аб гэтым заявіў кіраўнік МЗС Расіі Сяргей Лаўроў сёння ў інтэрв'ю беларускім журналістам, перадае карэспандэнт БЕЛТА.
"Што датычыцца працэсу збліжэння паміж Беларуссю і Еўрапейскім саюзам, у нас няма ніякіх наогул алергій, ніякага пачуцця рэўнасці, - сказаў Сяргей Лаўроў. - Гэта зразумелае імкненне любой краіны, у тым ліку і Расійскай Федэрацыі, шукаць узаемавыгадныя сувязі з усімі сваімі суседзямі".
Ён адзначыў, што з расійскага боку таксама не было якога-небудзь ахаладжэння да Еўрапейскага саюза. "Мы па-ранейшаму перакананы, што Расія і Еўрасаюз, як і Беларусь, і ЕС, іншыя нашы з вамі суседзі з Еўрасаюзам, павінны супрацоўнічаць транспарэнтна, раўнапраўна і адкрыта, - падкрэсліў кіраўнік расійскага знешнепалітычнага ведамства. - І мы ніколі не ставім перад нашымі партнёрамі на постсавецкай прасторы пытанне: вы павінны выбраць, з кім вы хочаце быць, Расіяй або з Захадам? Такое пытанне ставілі перад краінамі постсавецкай прасторы нашы заходнія калегі, і ставілі не раз".
Сяргей Лаўроў заявіў, што расійскі бок не хацеў бы, каб перад такім выбарам былі і ўдзельнікі праграмы "Усходняе партнёрства". "Мы былі гатовы з самага пачатку супрацоўнічаць з праектам "Усходняга партнёрства", прапаноўвалі Бруселю пашукаць праекты, якія ў рамках гэтай праграмы будуць аб'ядноўваць краіны ЕС, краіны, якія з'яўляюцца фокуснымі ў рамках "Усходняга партнёрства" і якія таксама ўключалі ў сябе ўдзел Расійскай Федэрацыі, - сказаў ён. - З таго часу мала што атрымалася, на жаль, але мы не робім з гэтага трагедыі, хоць ведаем, як нехта хоча гэты ў прынцыпе нацэлены на дасягненне карысных рэзультатаў працэс зноў ператварыць у нейкую антырасійскую задуму".
Кіраўнік МЗС Расіі перакананы, што Беларусь, улічваючы яе геапалітычнае становішча, не толькі мае права, але і павінна дабівацца добрых адносін з усімі сваімі суседзямі. "А тое, што да суседзяў прыходзіць азарэнне, яны пачынаюць адмаўляцца ад сваёй санкцыйнай, прымусовай пазіцыі ў адносінах з Беларуссю, можна толькі вітаць, - сказаў Сяргей Лаўроў. - Спадзяюся, што яны гэта робяць не для таго, каб зноў-такі паспрабаваць адарваць Беларусь ад Расіі, а проста таму, што пераканаліся: любыя санкцыі - гэта шлях у нікуды, нічога добрага яны ніколі нікому не прыносяць, у тым ліку і тым, хто іх заказвае і ажыццяўляе".
Інтэрв'ю кіраўніка МЗС Расіі беларускім СМІ было прымеркавана да 25-годдзя ўстанаўлення беларуска-расійскіх дыпламатычных адносін.-0-
