28 жніўня, Мінск /Юлія Дылянок - БЕЛТА/. Міністр замежных спраў Егіпта Самех Хасан Шукры падкрэслівае ўклад беларускага боку ў мірнае ўрэгуляванне рэгіянальных канфліктаў. Аб гэтым ён заявіў сёння на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
"Мы з захапленнем назіраем за вашымі намаганнямі па папулярызацыі, развіцці Беларусі, устанаўленні стабільнасці, стварэнні спрыяльных умоў і прагрэсу ў дзяржаве і ў цэлым ў рэгіёне. Нельга не адзначыць ваш уплыў на мірнае вырашэнне рэгіянальных канфліктаў. Гэта паказвае вашу мудрасць, ваша разуменне таго, наколькі важна мірнае ўрэгуляванне", - сказаў Самех Хасан Шукры.
Міністр падкрэсліў, што ў Беларусі знаходзіцца ўпершыню і чакае, што візіт будзе плённым. "Я разумею важнасць гэтага візіту. У мяне ёсць даручэнне перадаць самыя лепшыя пажаданні ад Прэзідэнта Егіпта Абдэля Фатаха аль-Сісі. Ён з цеплынёй успамінае візіт, які быў у пачатку гэтага года (афіцыйны візіт Прэзідэнта Беларусі ў Егіпет. - Заўвага БЕЛТА) і заклаў аснову для далейшага развіцця нашых адносін", - адзначыў Самех Хасан Шукры.
Ён пацвердзіў, што Егіпет разглядае адносіны з Беларуссю як важныя і разлічвае скарыстацца перавагамі, якія яны могуць прадаставіць для развіцця эканомікі. "Мы абмяркоўвалі сёння з маім калегам, міністрам замежных спраў Беларусі, што абодва міністры павінны стаць праваднікамі адносін, зняць існуючыя складанасці і выступіць своеасаблівымі каардынатарамі ўзаемных сувязей. Трэба забяспечыць на палітычным узроўні адсутнасць якіх-небудзь перашкод для развіцця эканамічных адносін", - рэзюмаваў міністр.-0-
