5 чэрвеня, Мінск /Кар. БЕЛТА/. Веснавыя палявыя работы ў Беларусі праведзены паспяхова, паведаміў сёння журналістам міністр сельскай гаспадаркі і харчавання Леанід Заяц на міжнароднай спецыялізаванай выстаўцы "Белагра-2018", перадае карэспандэнт БЕЛТА.
"Мы даволі паспяхова правялі ўвесь фронт веснавых палявых работ. За кароткі тэрмін выканалі ўвесь комплекс агратэхнічных мерапрыемстваў, накіраваных на сяўбу збожжавых і фарміраванне ўраджаю. Цяпер актыўна вядзём нарыхтоўку травяных кармоў. Нарыхтавана ў сукупнасці ўжо больш за 3 млн т сенажу і сіласу. Гэта вышэй за ўзровень мінулага года", - сказаў Леанід Заяц. Рэальная заработная плата аграрыяў вырасла на 14 працэнтаў, прадукцыйнасць працы - на 22 працэнты.
Разам з тым міністр звярнуў увагу на неспрыяльны ўплыў гарачага надвор'я на развіццё сельгаскультур. "Мы прымаем меры, выкарыстоўваем усю перадавую практыку з улікам кліматычных умоў, каб атрымаць добры ўраджай", - заявіў ён.
Міжнародная спецыялізаваная выстаўка "Белагра-2018" адкрылася сёння ў гандлёва-лагістычным цэнтры "Глобус Парк" у аграгарадку Шчомысліца Мінскага раёна. Удзел у выстаўцы прымаюць 536 кампаній з 28 краін, сярод якіх Аўстрыя, Вялікабрытанія, Германія, Данія, Іспанія, Італія, Польшча, Расія, ЗША, Украіна, Фінляндыя. Калектыўныя экспазіцыі прэзентавалі Міністэрства сельскай гаспадаркі і харчавання, Міністэрства прамысловасці, Нацыянальная акадэмія навук Беларусі, канцэрн "Белдзяржхарчпрам", Белкаапсаюз і іншыя міністэрствы і ведамствы Беларусі. Асобнымі экспазіцыямі прадстаўлены прадпрыемствы Чэхіі, Індыі, Пакістана.
Акрамя "Белагра-2018" у час Беларускага аграпрамысловага тыдня з 5 па 10 чэрвеня ў Мінскім раёне праходзяць міжнародныя спецыялізаваныя выстаўкі "Белферма", "Белпрадукт", "Прадмаш. Холад. Упак".-0-
