27 мая, Мінск /Кар. БЕЛТА/. МЗС будзе далучаць прадстаўнікоў Саюза юрыдычных асоб "Рэспубліканская канфедэрацыя прадпрымальніцтва" ў якасці экспертаў да работы дзелавых саветаў, якія Беларусь стварае з замежнымі краінамі. Гэта прадугледжана пагадненнем паміж міністэрствам і саюзам аб узаемадзеянні на 2016-2020 гады, якое падпісалі сёння ў МЗС міністр замежных спраў Уладзімір Макей і старшыня прэзідыума Рэспубліканскай канфедэрацыі прадпрымальніцтва Уладзімір Карагін, перадае карэспандэнт БЕЛТА.
Міністр адзначыў, што дакумент прадугледжвае таксама больш цеснае ўзаемадзеянне ў падрыхтоўцы і правядзенні замежных візітаў дзелавых колаў. МЗС разлічвае на актыўны ўдзел членаў канфедэрацыі ў мерапрыемствах знешнеэканамічнага характару, накіраваных на нарошчванне экспарту тавараў і паслуг, павелічэнне замежных інвестыцый, развіццё вытворчай кааперацыі з замежнымі партнёрамі.
Уладзімір Карагін падкрэсліў, што падпісанне пагаднення дапаможа прадоўжыць канструктыўны дыялог дзелавых колаў і дзяржавы, створыць умовы для далейшага павелічэння ўкладу малога і сярэдняга бізнесу ў эканоміку, у тым ліку ў экспартны яе складнік.
Дакумент быў распрацаваны ў кантэксце нацыянальнай праграмы падтрымкі і развіцця экспарту і Праграмы сацыяльна-эканамічнага развіцця Беларусі на 2016-2020 гады, а таксама ў ходзе падрыхтоўкі да Усебеларускага народнага сходу, дзе пытанням знешнеэканамічнай дзейнасці будзе ўдзелена самая пільная ўвага.
Пагадненне паміж МЗС і саюзам накіравана на далучэнне прадпрымальніцкіх колаў краіны да намаганняў дзяржавы па нарошчванні экспарту.-0-
