25 кастрычніка, Мінск /Кар. БЕЛТА/. У Цэнтральнай Еўропе адраджаецца "паліўны турызм": з-за рэзкага росту цэн на бензін у Германіі немцы ў масавым парадку адпраўляюцца ў суседнія краіны - Аўстрыю, Польшчу і Чэхію, паведамляе Euronews.
Літр бензіну ў Германіі каштуе ўжо амаль 2 еўра: гэта нават больш, чым у Вялікабрытаніі, якая перажывае пасля Brexit сур'ёзны транспартны крызіс.
Розніца ў цане на аўтамабільнае паліва ў Германіі з суседнімі краінамі дасягае 50 еўрацэнтаў. На думку нямецкіх вадзіцеляў, гэта цалкам кампенсуе больш доўгі шлях да замежнай запраўкі. Многія пры гэтым не абмяжоўваюцца поўным бакам, а бяруць з сабой каністры: прагнозы наконт росту цэн у ФРГ несуцяшальныя.
Яшчэ ў пачатку года ўрад Германіі павысіў падатак на выхлапы: з кожнага літра казна забірае сабе амаль палову за кошт розных збораў. А восенню здарыўся энергетычны крызіс па ўсёй Еўропе. Усё гэта прывяло да росту цэн на паліва. "Нямецкі аўтамабільны клуб" ужо заклікаў урад Германіі заканадаўча абмежаваць максімальную цану паліва.-0-
