13 студзеня, Масква /Эдуард Півавар - БЕЛТА/. Умацаванне міратворчага патэнцыялу Арганізацыі Дагавора аб калектыўнай бяспецы будзе прадоўжана. Аб гэтым заявіла сёння на брыфінгу афіцыйны прадстаўнік МЗС Расіі Марыя Захарава, паведамляе карэспандэнт БЕЛТА.
"З улікам вынікаў праведзенага 10 студзеня пазачарговага пасяджэння Савета калектыўнай бяспекі АДКБ планамерная работа па фарміраванні надзейнай сістэмы калектыўнай бяспекі Расіі і яе саюзнікаў, умацаванні ў тым ліку і міратворчага патэнцыялу арганізацыі будзе прадоўжана", - сказала Марыя Захарава.
Закранаючы міратворчую аперацыю АДКБ у Казахстане, яна адзначыла: арганізацыя аказала дапамогу ў аднаўленні стабільнасці ў дружалюбнай дзяржаве. "У адказ на зварот прэзідэнта Казахстана Такаева Саветам калектыўнай бяспекі АДКБ было прынята аднагалоснае рашэнне аб прадастаўленні брацкай краіне ваеннай дапамогі ў рамках Дагавора аб калектыўнай бяспецы. Аб гэтым рашэнні было паведамлена Савету Бяспекі ААН, а таксама генеральным сакратарам АБСЕ і ШАС", - нагадала афіцыйны прадстаўнік МЗС РФ.
У Казахстан былі неадкладна накіраваны калектыўныя міратворчыя сілы АДКБ, у склад якіх увайшлі падраздзяленні ўсіх краін-саюзнікаў. "Дзякуючы хуткай перакідцы і дзеянням міратворцаў АДКБ, перш за ўсё па ахове і абароне крытычна важных аб'ектаў інфраструктуры, праваахоўным органам Казахстана ўдалося сканцэнтраваць свае сілы і сродкі на аднаўленні правапарадку і ліквідацыі пагроз для бяспекі краіны", - канстатавала Марыя Захарава.
"Важна падкрэсліць, што самім казахстанскім кіраўніцтвам гэта міратворчая аперацыя АДКБ была ацэнена як у вышэйшай ступені эфектыўная і карысная", - дадала афіцыйны прадстаўнік МЗС РФ.-0-
