3 лютага, Мінск /Кар. БЕЛТА/. Пандэмія каранавіруса скончыцца ў Расіі пасля таго, як перахварэе 80 працэнтаў насельніцтва. Чакаецца, што адбудзецца гэта ў канцы 2022 года. Такім меркаваннем у інтэрв'ю інфармагенцтву URA.RU падзяліўся мікрабіёлаг, навуковы кіраўнік ДУ НДІ вакцын і сываратак імя І.І.Мечнікава акадэмік РАН Віталь Звераў.
"Я яшчэ ў самым пачатку пандэміі гаварыў, што ўсё скончыцца, калі 80 працэнтаў людзей перахварэюць. Да гэтага ўсё ідзе, і, здаецца, мы да канца бягучага года праблему, хутчэй за ўсё, вырашым. Не будзе такіх хваль, уздымаў, якія адбываюцца цяпер. Але вірус нікуды не знікне, ён застанецца ў выглядзе якіх-небудзь асенне-вясенніх уздымаў захваральнасці", - растлумачыў Віталь Звераў.
Паводле слоў акадэміка, з прыходам амікрон-штама знікла неабходнасць у захаванні строгіх санітарных абмежаванняў. "Два гады таму, калі ўсё пачыналася, вірус быў для ўсіх незразумелы, было невядома, якія ён будзе выклікаць захворванні, таму было вельмі важна мінімізаваць паток, паколькі вельмі шмат людзей мела патрэбу ў шпіталізацыі. На фоне гэтага ў краіне былі ўведзены абмежавальныя меры, потым яны сталі не патрэбны, а цяпер, на мой погляд, яны наогул не маюць ніякага сэнсу. Вірус стаў слабець, інакш кажучы, змяніў цяжар ходу хваробы, нягледзячы на тое, што значна хутчэй стаў распаўсюджвацца", - падкрэсліў Віталь Звераў.-0-
