23 верасня, Мінск /Кар. БЕЛТА/. Колькасць ахвяр каранавіруснай пандэміі ў ЗША перавысіла 200 тыс. чалавек. Такія зводныя даныя прадставіў універсітэт Джонса Хопкінса на падставе інфармацыі ад улад штатаў, паведамляе Euronews.
Больш за ўсё памерлых зарэгістравана ў Нью-Ёрку (33 092), за ім ідуць Нью-Джэрсі (16 069) і Тэхас (15 132). У глабальнай статыстыцы Злучаныя Штаты займаюць першае месца па колькасці інфіцыраваных - з пачатку пандэміі пацверджаны амаль 7 млн выпадкаў заражэння COVID-19. Часткова такія высокія паказчыкі тлумачаць масавым тэсціраваннем на каранавірус. У лік краін, дзе больш за 1 млн інфіцыраваных, уваходзяць таксама Індыя, Бразілія і Расія.
У сакавіку прэзідэнт ЗША Дональд Трамп заявіў, што калі колькасць ахвяр пандэміі каранавіруса не перавысіць 200 тыс., то гэта будзе ўжо добра. У лютым, калі ў краіне было зарэгістравана 15 выпадкаў COVID-19, ён аб'явіў, што на працягу некалькіх дзён колькасць захварэлых наблізіцца да нуля. Белы дом неаднаразова крытыкавалі за тое, як ён спрабуе справіцца з эпідэміяй. Але Трамп лічыць, што яго адміністрацыя правяла фенаменальную работу.
21 верасня ў Паўночнай Дакоце было выяўлена больш за 3,2 тыс. актыўных выпадкаў COVID-19, 87 чалавек шпіталізаваны. Гэты штат цяпер займае першае месца ў ЗША па колькасці захварэлых на душу насельніцтва за апошнія два тыдні. Узровень заражэння расце таксама ў Вісконсіне, Тэхасе і Паўднёвай Дакоце. Павялічваецца і трывога наконт таго, што з надыходам халадоў інфекцыя будзе распаўсюджвацца хутчэй.-0-
