21 кастрычніка, Мінск /Кар. БЕЛТА/. Праваахоўнікі Вялікабрытаніі ў ходзе тыднёвай аперацыі па барацьбе з наркагандлем у Англіі і Уэльсе затрымалі амаль 1,5 тыс. чалавек, паведамляе BBC.
Вынікам аперацыі стала затрыманне 1468 чалавек, з іх 139 галоўных наркагандляроў, канфіскавана наркотыкаў амаль на $2,76 млн (у прыватнасці, 6 кг крэк-какаіну, 28,8 кг гераіну і 26,8 кг какаіну), а таксама 289 адзінак зброі, у тым ліку 49 пісталетаў і 120 нажоў. Паліцыя таксама наведала 894 дамы, у якіх наркабанды арганізавалі свой бізнес.
Аперацыю праводзілі па так званых акруговых бандах - гэта гарадскія гандляры наркотыкамі, якія прадаюць свой тавар кліентам у сельскіх раёнах праз выдзеленыя тэлефонныя лініі.
Праваахоўнікі адзначаюць, што на гэты час яны з'яўляюцца асновай наркабізнесу ў Вялікабрытаніі, і часта для дасягнення сваіх злачынных мэт яны прымяняюць насілле, пагрозы і прымушэнне. Для распаўсюджвання і гандлю наркотыкаў прыцягваюць непаўналетніх.
Паводле слоў намесніка памочніка камісара Нацыянальнага савета начальнікаў паліцыі Грэма Макналці, 85 працэнтаў абвінавачаных цяпер прызнаюць сябе вінаватымі, а колькасць абвінаваўчых прыгавораў складае 99 працэнтаў.
"Лічбы гавораць самі за сябе. Мы спыняем агідных злачынцаў, якія жорстка абыходзяцца з маладымі людзьмі і набіваюць сабе кішэні", - сказаў ён.-0-