14 красавіка, Мінск /Кар. БЕЛТА/. Тысячы фермерскіх гаспадарак у ПАР блізкія да разарэння з-за рэзкага росту цэн на ўгнаенні, выкліканага крызісам ва Украіне і санкцыямі, уведзенымі шэрагам заходніх краін у адносінах да Расіі, паведамляе ТАСС са спасылкай на радыёстанцыю SABC.
Паводле слоў фермераў, з канца лютага цэны на ўгнаенні выраслі ў ПАР на 85 працэнтаў. "Крызіс ва Украіне каштуе нам дорага, - заяўляюць яны. - У найбольш цяжкай сітуацыі апынуліся невялікія гаспадаркі".
Адзін з фермераў растлумачыў, што ён сам, як і дзясяткі тысяч іншых у ПАР, прадае агародніну па кантракце, заключаным у мінулым годзе. "Фіксаваныя цэны былі ўстаноўлены на ўсю нашу аграрную прадукцыю, аднак цяпер сітуацыя з вытворчымі затратамі істотна змянілася, паколькі даводзіцца больш плаціць за ўгнаенні і паліва, - адзначыў ён. - Пры дзеючых кантрактах на пастаўку нашай прадукцыі мы выходзім у мінус, а змяніць кантракты няма магчымасці". У выніку многія фермерскія гаспадаркі апынуліся на мяжы разарэння.
ПАР імпартуе да 80 працэнтаў прымяняемых у краіне ўгнаенняў. Значная іх частка паступае або непасрэдна з РФ, або ад еўрапейскіх кампаній, якія выкарыстоўваюць расійскую сыравіну. Паўднёваафрыканскія фермеры на адзін гектар пасеваў уносяць каля 73 кг угнаенняў.
Нараўне з ПАР цяжкасці ў закупках угнаенняў адчуваюць і іншыя краіны Афрыкі. Сярод іх - Замбія, Кенія і Нігерыя, аграрны сектар якіх спажывае вялікую колькасць угнаенняў. Скарачэнне колькасці ўгнаенняў, якія ўносяцца ў глебу, вядзе да змяншэння аб'ёмаў ураджаю, росту цэн на прадукты харчавання і стварэння пагрозы голаду ў шэрагу раёнаў Афрыкі.-0-
