20 мая, Мінск /Кар. БЕЛТА/. Амаль 60 млн чалавек па ўсім свеце могуць апынуцца ў стане крайняй беднасці з-за пандэміі каранавіруса, лічыць прэзідэнт Сусветнага банка (СБ) Дэвід Малпас. Аб гэтым паведамляе ТАСС са спасылкай на адпаведную заяву, апублікаваную на сайце арганізацыі.
Адзначаецца, што такі вынік звядзе на нішто значную частку апошніх дасягненняў у барацьбе з беднасцю.
Паводле слоў Дэвіда Малпаса, для вяртання да эканамічнага росту трэба хутка і гібка рэагаваць на надзвычайную сітуацыю. Неабходна дапамагаць бедным слаям насельніцтва, у тым ліку грашыма, падтрымліваць прыватны сектар і ўмацоўваць устойлівасць эканомікі.
Сусветны банк аказаў дапамогу ў барацьбе з пандэміяй ужо 100 дзяржавам, на якія прыпадае 70 працэнтаў насельніцтва планеты. СБ абавязваецца на працягу 15 месяцаў выдзеліць краінам, якія сталі на шлях развіцця, $160 млрд у выглядзе грантаў, пазык і інвестыцый для барацьбы з наступствамі пандэміі.-0
