13 жніўня, Мінск /БЕЛТА - КАЗІНФАРМ/. Урад Казахстана зацвердзіў план паэтапнага зняцця каранцінных мер з улікам бягучай эпідэміялагічнай сітуацыі.
Як паведамілі ў прэс-службе ўрада Казахстана, у перыяд дзеяння каранцінных мер у рэспубліцы ўдалося стабілізаваць эпідэміялагічную сітуацыю і значна знізіць нагрузку на медыцынскія арганізацыі. Штосутачны прырост заражаных COVID-19 знізіўся з 4 працэнтаў да 0,5 працэнта. Колькасць выздаравеўшых дасягнула 76 працэнтаў. Сярэдні паказчык рэпрадуктыўнасці віруса знізіўся да 0,78, загружанасць ложкаў складае 26 працэнтаў. У сувязі з гэтым быў зацверджаны план паэтапнага зняцця каранцінных мер.
У прыватнасці, з 17 жніўня ва ўсіх рэгіёнах Казахстана адновяць работу гандлёва-забаўляльныя цэнтры, крытыя рынкі, салоны прыгажосці, цырульні, фітнес-цэнтры, лазні і саўны без басейнаў, дзіцячыя і дарослыя адукацыйныя цэнтры, атракцыёны на адкрытым паветры. На некаторых аб'ектах будуць дзейнічаць абмежаванні па колькасці наведвальнікаў.
Таксама з 17 жніўня ў краіне дазваляюцца індывідуальныя і групавыя трэніроўкі на адкрытым паветры (не больш за 5 чалавек) і спартыўныя трэніроўкі для нацыянальных зборных, клубных каманд (не больш за 30 чалавек). Акрамя таго, з пэўнымі абмежаваннямі будзе адноўлены рух грамадскага транспарту.
Пры гэтым захоўваецца забарона на правядзенне відовішчных, спартыўных і іншых масавых мерапрыемстваў. Па-ранейшаму не будуць працаваць кінатэатры, караоке, начныя клубы, музеі, рэлігійныя і іншыя аб'екты.
"Масачны рэжым і сацыяльнае дыстанцыраванне з'яўляюцца абавязковымі санітарнымі патрабаваннямі для ўсіх, гэта павінна стаць паўсядзённымі правіламі ў жыцці грамадзян. Аднаўляць дзейнасць суб'ектаў бізнесу неабходна толькі пры іх поўнай гатоўнасці", - заявіў на пасяджэнні ўрада прэм'ер-міністр Казахстана Аскар Мамін.
Агульная колькасць хворых на COVID-19 у Казахстане перасягнула 101 тыс., з моманту ўспышкі памерла 1269 чалавек.-0-