ДЗЯРЖОРГАНЫДЗЯРЖОРГАНЫ
Флаг Панядзелак, 27 верасня 2021
Мінск Ясна +13°C
Усе навіны
Усе навіны
У свеце
26 ліпеня 2021, 15:02

У Францыі прынялі рэзанансны закон аб санітарных пропусках і абавязковай вакцынацыі

Фота з архіва
Фота з архіва

26 ліпеня, Мінск /Кар. БЕЛТА/. Нацыянальны сход Францыі, нягледзячы на шматтысячныя пратэсты, падтрымаў законапраект, які прадугледжвае ўзмацненне мер па барацьбе з пандэміяй, паведамляе Deutsche Welle.

За тэкст дакумента прагаласавалі 156 дэпутатаў, супраць - 60, яшчэ 14 устрымаліся. Такім чынам, французскі заканадаўчы орган даў зялёнае святло абавязковай вакцынацыі для работнікаў некаторых сфер, а таксама пашырыў дзеянне так званых санітарных пропускаў.

Са жніўня для наведвання рэстаранаў і пасадкі на паязды далёкага накіравання спатрэбіцца прад'явіць адмоўны вынік тэста на каранавірус. У кінатэатрах, тэатрах і музеях Францыі падобныя правілы ўступілі ў сілу з 21 ліпеня: уваход дазваляецца толькі прышчэпленым, тым, хто перахварэў на COVID-19 або прад'явіў адмоўны тэст на каранавірус. Ад абавязковага тэсціравання вызвалены непаўналетнія. Аднак наяўнасць санітарных пропускаў не стала неабходнай умовай для наведвання вулічных секцый рэстаранаў.

Канчатковы варыянт закона абмяркоўваўся на працягу некалькіх дзён. Пасля шэрага паправак да першапачатковага законапраекта члены Нацыянальнага сходу і Сената Францыі ўзгаднілі кампрамісны тэкст. Ён прадугледжвае абавязковую вакцынацыю ад каранавіруса для медработнікаў, іншых супрацоўнікаў сферы аховы здароўя, выратавальных службаў, а таксама пажарных. Аднак, у адрозненне ад прапаноў урада, якія выказваліся раней, тым, хто адмовіўся ад прышчэпкі сярод названых катэгорый асоб, пагражае не звальненне, а толькі прыпыненне выплаты заработнай платы.

Закон прыняты нягледзячы на тое, што ў выхадныя ў Францыі больш за 160 тыс. чалавек выйшлі на вуліцы з пратэстамі супраць узмацнення абмежаванняў. У Парыжы дэманстранты заклікалі да адстаўкі прэзідэнта Эмануэля Макрона, якога мітынгуючыя, у прыватнасці, называлі тыранам.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі