3 мая, Мінск /Кар. БЕЛТА/. У Эстоніі ўлады змякчылі шэраг абмежаванняў, уведзеных для барацьбы з распаўсюджваннем каранавіруса, паведамляе эстонскае грамадскае вяшчанне Rus.err.
З 3 мая за школьныя парты сядуць вучні класаў з першага па чацвёрты, а таксама выпускных класаў.
Прадпрыемствам грамадскага харчавання дазволена абслугоўваць кліентаў на тэрасах да 21.00. Пры гэтым дзейнічае патрабаванне запаўняльнасці рэстаранаў і кафэ на 50 працэнтаў, за адным сталом могуць сядзець не больш за 10 чалавек.
Магазіны рознічнага гандлю змогуць зноў адкрыць свае дзверы, дазволена запаўняльнасць - не большая за 25 працэнтаў. З такімі ж абмежаваннямі дазволена работа музеяў і выстаў, якія павінны будуць закрывацца не пазней за 19.00.
Зноў дазволены трэніроўкі ў закрытых памяшканнях з выкананнем дыстанцыйных правіл.
Прадпрыемствы забаўляльнай сферы, тэатры, кінатэатры, спа-цэнтры і лазні пакуль застаюцца закрытымі. Выкарыстоўваць басейны можна толькі для правядзення спартыўных трэніровак.
Лакдаўн у Эстоніі быў уведзены з 11 сакавіка.-0-