1 сакавіка, Мінск /Кар. БЕЛТА/. У Чэхіі за выкананнем уведзеных з-за пандэміі каранавіруса абмежаванняў будуць сачыць 26 тыс. паліцэйскіх. Аб гэтым заявіў кіраўнік чэшскай паліцыі Ян Швейдар, паведамляе "Радыё Прага".
Паводле слоў Яна Швейдара, кантрольныя пасты з'явяцца на ўсіх галоўных аўтамагістралях краіны. Кантрольныя рэйды таксама будуць ажыццяўляцца ў пасажырскіх паяздах і ў прыгарадных і міжгародніх аўтобусах.
З-за росту колькасці заражаных каранавірусам з 1 сакавіка ў Чэхіі на тры тыдні ўводзіцца абмежаванне на свабоднае перамяшчэнне па краіне. Грамадзянам часова забараняецца без вострай неабходнасці выязджаць за межы абласцей, дзе яны пражываюць. Выключэнне складаюць толькі паездкі, звязаныя з выкананнем службовых абавязкаў, для аказання неабходнай дапамогі сваякам, а таксама паездкі з мэтай наведвання ўрачоў.-0-
