1 ліпеня, Мінск /Кар. БЕЛТА/. Страты сусветнай эканомікі ў выпадку, калі крызіс у сектары турызму зацягнецца да 12 месяцаў, могуць скласці $3,3 трлн. Такі прагноз змешчаны ў апублікаваным 1 ліпеня ў Жэневе дакладзе Канферэнцыі ААН па гандлі і развіцці (ЮНКТАД), паведамляе ТАСС.
Падкрэсліваецца, што сектар сусветнага турызму можа страціць па меншай меры $1,2 трлн, што складае 1,5 працэнта глабальнага ВУП, з-за застою на працягу амаль чатырох месяцаў з-за пандэміі каранавіруса. Разам з тым, паводле ацэнак экспертаў, гэтыя страты вырастуць да $2,2 трлн, калі крызіс прадоўжыцца восем месяцаў.
"На думку ЮНКТАД, згодна з песімістычным сцэнарыем, 12-месячны збой у сектары міжнароднага турызму прывядзе да страт у памеры $3,3 трлн, што складае 4,2 працэнта сусветнага ВУП", - канстатуюць аўтары даклада.
У ЮНКТАД нагадваюць, што турызм уяўляе сабой станавы хрыбет для эканомікі многіх краін і крыніцу заработку для мільёнаў людзей па ўсім свеце. Меры самаізаляцыі, абмежаванні на паездкі і зніжэнне даходаў насельніцтва запавольваюць аднаўленне гэтага сектара.
"Для многіх краін, напрыклад маленькіх астраўных дзяржаў, калапс турызму азначае крах перспектыў іх развіцця, і гэтага нельга дапусціць", - заявіла дырэктар аддзела міжнароднага гандлю ЮНКТАД Памэла Коўк-Хамільтан.
Згодна з дакладам, асабліва цяжкія страты ў выніку спаду ў сектары турызму нясуць краіны, якія сталі на шлях развіцця. Страты Тайланда ацэньваюцца ў памеры 11 працэнтаў ВУП, Ямайкі - 9 працэнтаў, Кеніі, Егіпта і Малайзіі - да 3 працэнтаў. Чакаецца рэзкі рост беспрацоўя. Аднак і багатыя дзяржавы ў выніку змяншэння патоку турыстаў недалічацца мільярдаў долараў. Крызіс турыстычнай галіны, папярэджваюць у ЮНКТАД, будзе адчувацца і ў іншых сферах эканомікі, якія забяспечваюць турыстаў таварамі і паслугамі. Паводле ацэнак экспертаў, страта кожнага мільёна долараў даходаў ад турызму абернецца для дзяржаў стратамі ў памеры $2-3 млн з улікам сітуацыі ў іншых галінах эканомікі.-0-
