6 жніўня, Мінск /Кар. БЕЛТА/. Трапічны шторм можа прыйсці ў Токіа 8 жніўня ў дзень закрыцця Алімпійскіх гульняў. Аб гэтым паведамляе ТАСС са спасылкай на спікера аргкамітэта "Токіа-2020" Масу Такая.
"Мы ўважліва сочым за сітуацыяй, гэта ўсё, што я магу сказаць цяпер. Аргкамітэт гатовы да непрадбачаных сітуацый, але я не хацеў бы цяпер сур'ёзна гаварыць пра ўплыў шторму на цырымонію закрыцця, паколькі такім чынам мы можам выклікаць спекуляцыі вакол саміх жа сябе", - сказаў Такая.
Афіцыйны прадстаўнік асабліва падкрэсліў, што размова ідзе не пра тайфун, а пра трапічны шторм, чыя сіла не такая разбуральная.
Алімпійскія гульні ў Токіа праходзяць з 23 ліпеня па 8 жніўня. У заключны дзень спаборніцтваў, акрамя цырымоніі закрыцця, будуць разыграны 13 камплектаў узнагарод.-0-
