8 красавіка, Мінск /Кар. БЕЛТА/. Сусветныя цэны на прадукты харчавання ў сакавіку дасягнулі самага высокага ўзроўню за ўсю гісторыю, паведамляецца на афіцыйным сайце Харчовай і сельскагаспадарчай арганізацыі ААН (ФАО).
Індэкс цэн ФАО на прадукты харчавання ў сакавіку склаў 159,3 пункта, што на 12,6 працэнта больш, чым у лютым, калі ён ужо дасягнуў самага высокага ўзроўню з моманту яго стварэння ў 1990 годзе.
Індэкс цэн на збожжавыя ў сакавіку быў на 17,1 працэнта вышэйшы, чым у лютым, што абумоўлена значным павышэннем цэн на пшаніцу і ўсё фуражнае збожжа ў асноўным з-за падзей ва Украіне. За апошнія тры гады на Расійскую Федэрацыю і Украіну разам узятыя прыпадала каля 30 працэнтаў і 20 працэнтаў адпаведна сусветнага экспарту пшаніцы і кукурузы.
Сусветныя цэны на пшаніцу за месяц выраслі на 19,7 працэнта, што тлумачыцца апасеннямі наконт стану пасеваў у ЗША. Між тым цэны на кукурузу выраслі на 19,1 працэнта ў параўнанні з папярэднім месяцам, дасягнуўшы рэкорднага ўзроўню разам з цэнамі на ячмень і сорга.
Індэкс цэн на алей, вядучым сусветным экспарцёрам якога з'яўляецца Украіна, вырас на 23,2 працэнта. Цэны на пальмавы, соевы і рапсавы алей таксама прыкметна выраслі ў выніку больш высокіх цэн на сланечнікавы алей і росту цэн на сырую нафту.
Індэкс цэн на цукар вырас на 6,7 працэнта ў параўнанні з лютым. Гэта больш як на 20 працэнтаў вышэй, чым у сакавіку 2021 года.
Індэкс цэн на мяса вырас у сакавіку на 4,8 працэнта і дасягнуў рэкордна высокага ўзроўню, што было абумоўлена падаражэннем свініны. Міжнародныя цэны на птушку таксама выраслі ў сувязі са скарачэннем паставак з вядучых краін-экспарцёраў пасля ўспышак птушынага грыпу.
Індэкс цэн на малочныя прадукты ФАО вырас за месяц на 2,6 працэнта. Гэта на 23,6 працэнта вышэй, чым у сакавіку 2021 года.-0-
