27 кастрычніка, Мінск /Кар. БЕЛТА/. На фоне эканамічнага крызісу, звязанага ў тым ліку з COVID-19, адбываецца рост ультраправых настрояў. Найбольш яскрава гэта праяўляецца ва Украіне і краінах Балтыі. Аб гэтым расказаў праваабаронца Максім Вілкоў, паведамляе аналітычны партал RuBaltic.Ru.
Адпаведную заяву ён зрабіў у час свайго даклада на пленарным пасяджэнні "Экстрэмізм. Рэгіянальная спецыфіка: Еўропа і Азія". "Мы бачым некаторы рост ультраправых настрояў у Еўропе, які адбываецца на фоне эканамічнага крызісу і на фоне крызісу COVID-19. Але ёсць некалькі краін у рэгіёне, дзе гэты рост відаць найбольш яскрава. І я не пабаюся сказаць, што гэта ў першую чаргу краіны Прыбалтыкі і, зразумела, Украіна", - расказаў Максім Вілкоў.
Паводле яго слоў, на дзяржаўным узроўні адбываецца змешванне палітыкі ультраправых рухаў і ўрада краін Балтыі і Украіны. Гэта звязана з тым, што "ва ўмовах крызісу вельмі добра распаўсюджваюцца ультраправыя рухі".
"Да такой ступені, што тое, што прадстаўнікі гэтых рухаў гавораць, становіцца асноўнай ідэяй у грамадстве. Таму што ультраправыя даюць вельмі простыя адказы на складаныя пытанні. Зразумела, што гэтыя адказы зусім няправільныя, пагадзіцца мы з імі не можам, але яны вельмі простыя і зразумелыя для непадрыхтаванага чалавека", - растлумачыў эксперт.
Максім Вілкоў адзначыў, што палітыкі бяруць на ўзбраенне гэтыя ідэі і прымяняюць іх на практыцы дзеля пагоні за галасамі і ўплывам у грамадстве.
Другой прычынай, чаму гэта адбываецца менавіта ў краінах постсавецкай прасторы, эксперт назваў іх "цікавы генезіс стварэння". "Гэтыя краіны ў многім былі створаны менавіта на аснове адмаўлення савецкага мінулага, на аснове адмаўлення Савецкага Саюза, які ўспрымаўся як той самы вораг, ад якога яны аддзяліліся і здабылі сваю незалежнасць", - расказаў Максім Вілкоў.
Такім чынам, паводле яго слоў, калі ствараліся дзяржавы - ім патрэбны былі свае героі. І для краін Балтыі і Украіны героямі сталі тыя, хто змагаўся з СССР, калабарацыянісцкія арганізацыі часоў Другой сусветнай вайны.
"Усё гэта разам прыводзіць да таго, што ідэі, якія выказваюць ультраправыя, не з'яўляюцца ў гэтых краінах нечым ганебным. І, як вынік, гэтыя ідэі ўваходзяць у нармальную, мэйнстрымную палітычную прастору", - падкрэсліў Максім Вілкоў.
Эксперт адзначыў, што на ультраправыя ідэі не рэагуюць ні Еўрапейскі саюз, ні міжнародныя арганізацыі, у выніку гэта ўсё ўплывае на заканадаўства. Ён прывёў у прыклад моўныя законы і законы аб адукацыі, прынятыя ў краінах Балтыі і Украіне, якія падкрэсліваюць монаэтнічны характар дзяржавы і фактычна паўтараюць тыя ідэі, якія выказваюць ультраправыя рухі ў гэтых дзяржавах.
"Міжнародныя і еўрапейскія арганізацыі, а таксама мэйнстрымныя палітыкі нічога з ростам уплыву ультраправых ідэй зрабіць не могуць. У грамадстве гэтых краін рухі знаходзяць падтрымку, таму ў далейшым іх уплыў будзе ўзмацняцца", - рэзюмаваў Максім Вілкоў.-0-