12 студзеня, Мінск /Кар. БЕЛТА/. Па выніках пасяджэння Савета Расія - НАТА (СРН), якое адбылося ў Бруселі, паміж бакамі засталіся сур'ёзныя рознагалоссі, якія ў першую чаргу датычацца сітуацыі ва Украіне і пытанняў еўрапейскай бяспекі, паведамляе ТАСС.
Генеральны сакратар НАТА Енс Столтэнберг на прэс-канферэнцыі па выніках сустрэчы заявіў, што НАТА адмаўляецца ісці на кампраміс у пытаннях прыняцця тых ці іншых краін, у тым ліку Украіны, у альянс. "Усе саюзнікі сышліся на думцы, што датычыцца галоўнага прынцыпу альянсу: кожная краіна можа сама выбіраць свой шлях. Толькі Украіна і 30 членаў НАТА могуць вырашаць, калі Кіеў гатовы стаць членам альянсу", - адзначыў Столтэнберг.
"Саюзнікі НАТА падкрэслілі, што яны прыкладуць усе намаганні для пошуку палітычных шляхоў для руху наперад. Я таксама вітаю двухбаковыя кансультацыі паміж ЗША і РФ, таксама як і заўтрашнюю сустрэчу АБСЕ. Усё гэта магчымасці для канструктыўнага ўзаемадзеяння ў імя інтарэсаў бяспекі Еўропы, якія не павінны быць упушчаны", - адзначыў Енс Столтэнберг.
Енс Столтэнберг таксама заявіў, што НАТА выказала гатоўнасць да сустрэч з прадстаўнікамі РФ для абмеркавання розных тэм, уключаючы абмежаванні на ракетныя ўзбраенні ў Еўропе, і бачыць зацікаўленасць у такім дыялогу з боку Масквы.
Акрамя таго, Енс Столтэнберг паведаміў, што НАТА зацікаўлена ў аднаўленні работы сваёй місіі ў Маскве, а таксама расійскай дыпламатычнай прысутнасці ў штаб-кватэры Паўночнаатлантычнага альянсу ў Бруселі.
Пасяджэнне СРН стала другім этапам кансультацый Расіі і дзяржаў Захаду па расійскіх прапановах аб еўрабяспецы. Першы этап - перагаворы РФ і ЗША прайшлі ў Жэневе 10 студзеня, трэці этап у рамках АБСЕ адбудзецца ў Вене 13 студзеня. Расійскую дэлегацыю ў Бруселі ўзначальваюць намеснік кіраўніка МЗС РФ Аляксандр Грушко і намеснік міністра абароны Расіі Аляксандр Фамін. З боку НАТА ў перагаворах удзельнічаюць першы намеснік дзяржсакратара ЗША Уэндзі Шэрман, генеральны сакратар альянсу Енс Столтэнберг, пастаянныя прадстаўнікі 30 дзяржаў альянсу ў Бруселі.-0-
