13 мая, Мінск /Кар. БЕЛТА/. Злучаныя Штаты лічаць важным зніжэнне ўзроўню здабычы нафты і рост попыту на яе для адкрыцця сусветных эканомік. Аб гэтым заявіў прадстаўнік Міністэрства энергетыкі ЗША па выніках тэлефоннай размовы кіраўнікоў энергетычных ведамстваў ЗША і Расіі Дэна Бруета і Аляксандра Новака, паведамляе ТАСС.
"Міністр Брует абмеркаваў па тэлефоне з міністрам Новакам стабілізацыю сусветных рынкаў нафты. Бакі адзначылі, што ў сувязі з тым, што свет працуе над пераадоленнем пандэміі, скарачэнне здабычы нафты і чаканы рост попыту на яе знізілі рыначную валацільнасць, - звярнулі ўвагу ў міністэрстве. - Гэта асабліва важна, улічваючы, што эканомікі па ўсім свеце пачынаюць бяспечна і адказна адкрывацца".
Як паведаміў расійскі бок, Аляксандр Новак і Дэн Брует дамовіліся прадоўжыць дыялог. Краіны ОПЕК+ 12 красавіка заключылі новае пагадненне аб скарачэнні здабычы нафты. Яно прадугледжвае сукупнае зніжэнне сутачнай здабычы нафты ў маі-чэрвені на 9,7 бараляў, у ліпені-снежні - на 7,7 млн бараляў, у студзені 2021 - красавіку 2022 года - на 5,8 млн бараляў.
У прыватнасці, Расія і Саудаўская Аравія, буйнейшыя ўдзельнікі здзелкі, скароцяць здабычу на 2,5 млн бараляў у суткі кожная з узроўню 11 млн бараляў. Астатнія краіны будуць скарачаць здабычу ад узроўню кастрычніка 2018 года.-0-
