16 снежня, Нур-Султан /БЕЛТА - КАЗІНФАРМ/. Сёння казахстанцы адзначаюць адно з галоўных свят - Дзень Незалежнасці Рэспублікі Казахстан. У гэтым годзе незалежнасці краіны споўнілася 30 гадоў.
Традыцыйна ў Дзень Незалежнасці па ўсёй краіне праходзяць урачыстыя мерапрыемствы, запускаюцца сацыяльныя аб'екты. У юбілейны, 2021 год многія мерапрыемствы былі прысвечаны менавіта Дню Незалежнасці.
Прэзідэнт Касым-Жамарт Такаеў прыняў удзел у традыцыйнай урачыстай цырымоніі ўручэння дзяржаўных узнагарод і прэмій. Грамадзяне ўсёй краіны, якія вызначыліся, у адпаведнасці з указам кіраўніка дзяржавы атрымалі дзяржаўныя ўзнагароды, медалі. У гонар 30-годдзя незалежнасці Рэспублікі Казахстан у Нур-Султане 15 снежня з трох пунктаў горада запусцілі святочны салют.
Напярэдадні адбылося ўрачыстае мерапрыемства з нагоды 30-гадовай гадавіны незалежнасці, у якім прынялі ўдзел Касым-Жамарт Такаеў і Елбасы Нурсултан Назарбаеў.
"Трыццаць гадоў незалежнасці - цэлая эпоха. Гэта эпоха ўпартага пераадолення цяжкасцей і выпрабаванняў, эпоха, параўнальная з працяглай цярністай дарогай у нязведанае. Гэта эпоха стваральнай працы, якая па сваіх дасягненнях і значэнню стала паваротнай у гісторыі нашага народа. Таму ад імя грамадзян нашай краіны хачу выказаць Нурсултану Абішавічу Назарбаеву сардэчную падзяку за яго тытанічную працу ў справе будаўніцтва незалежнага Казахстана", - падкрэсліў Касым-Жамарт Такаеў у сваім выступленні.
Цяпер жа перад Казахстанам стаіць задача аператыўнага будаўніцтва эканомікі будучага і ў цэлым краіны. Яе асновай стануць новыя тэхналогіі, штучны інтэлект, высокая прадукцыйнасць працы, творчая ініцыятыва і, безумоўна, будучае пакаленне.
З юбілеем незалежнасці казахстанцаў віншуюць і сусветныя лідары. Звыш 120 краін афіцыйна прызналі і ўстанавілі дыпламатычныя адносіны з Казахстанам.
Дзень Незалежнасці адзначаецца 16 і 17 снежня згодна з законам "Аб дзяржаўнай незалежнасці Рэспублікі Казахстан". У 1991 годзе 16 снежня Вярхоўны савет прыняў закон "Аб незалежнасці і суверэнітэце дзяржавы". 1 снежня 1991 года адбыліся першыя ў гісторыі краіны выбары Прэзідэнта, па выніках якіх кандыдатуру Нурсултана Назарбаева падтрымала больш за 98 працэнтаў выбаршчыкаў.-0-