10 сакавіка, Мінск /Кар. БЕЛТА/. Урад Ізраіля прыняў рашэнне аб уводзе абавязковага двухтыднёвага каранціну для ўсіх грамадзян, якія прыязджаюць у краіну, паведамляе ізраільскі "9 канал".
"Гэта няпростае рашэнне, але неабходнае для таго, каб захаваць здароўе насельніцтва, а здароўе насельніцтва - перш за ўсё", - паведаміў прэм'ер-міністр краіны Біньямін Нетаньяху.
Гэта правіла ўступіла ў сілу для ізраільцян, якія вяртаюцца ў краіну, з вечара 9 сакавіка. Для замежных грамадзян пачатак яго дзеяння адкладзены на 72 гадзіны, гэта значыць на трое сутак. Пры гэтым турыстаў будуць пускаць толькі ў тым выпадку, калі ў іх ёсць пастаянны адрас на час знаходжання ў краіне, па якім яны павінны будуць знаходзіцца ў каранціне.
Усеагульны каранцін для прыбываючых з-за мяжы будзе дзейнічаць на працягу бліжэйшых двух тыдняў, затым урад правядзе ацэнку сітуацыі і прыме далейшае рашэнне аб тым, ці падаўжаць такое абмежаванне.
Паводле даных улад, каля 117 тыс. ізраільцян з пачатку года адправіліся за мяжу і пакуль не вярнуліся ў краіну. Цяпер у дамашняй ізаляцыі знаходзяцца каля 90 тыс. ізраільцян.
Паводле ацэнак спецыялістаў, рашэнне ўрада нанясе сур'ёзны ўрон ізраільскай эканоміцы - за мяжу лятае мноства ізраільцян, а адтуль прылятае мноства замежных грамадзян, якія падтрымліваюць рэгулярныя дзелавыя сувязі з Ізраілем. Такім чынам, у Ізраіль практычна перастануць прыязджаць іншаземцы, акрамя тых, у каго тут сваякі і хто мае намер правесці з імі два тыдні ў рэжыме дамашняй ізаляцыі.
Паводле падлікаў Мінфіна Ізраіля, кожны тыдзень каранціну будзе абыходзіцца ізраільскай эканоміцы ў мільярд шэкеляў.
З моманту ўспышкі каранавіруса ў Ізраілі зафіксавана 42 выпадкі заражэння, тры чалавекі поўнасцю выздаравелі.-0-
