4 жніўня, Мінск /Кар. БЕЛТА/. Школы павінны быць адкрыты як мага хутчэй - як толькі ўдасца ўзяць пад кантроль распаўсюджванне COVID-19. Аб гэтым заявіў генеральны сакратар ААН Антоніу Гутэрыш у сваім відэазвароце, прысвечаным пытанням адукацыі ў перыяд пандэміі. Генеральны сакратар расказаў пра план з чатырох пунктаў, асноўная мэтай якога - прадухіленне катастрафічных наступстваў пандэміі ў сферы адукацыі, паведамляе Цэнтр навін ААН.
Кіраўнік ААН нагадаў, што свет сутыкнуўся з крызісам навучання яшчэ да пандэміі: больш за 250 млн дзяцей школьнага ўзросту ў розных краінах не мелі магчымасці наведваць школу, толькі чвэрць вучняў сярэдніх школ у краінах, якія сталі на шлях развіцця, заканчвалі вучобу з неабходнымі базавымі навыкамі. "Цяпер мы сутыкаемся з катастрофай значна большага маштабу, здольнай звесці на нішто дзесяцігоддзі прагрэсу і пагоршыць укаранёную ў свеце няроўнасць", - заявіў Антоніу Гутэрыш.
Пандэмія COVID-19, паводле слоў генеральнага сакратара ААН, прывяла да буйнейшага ў сучаснай гісторыі правалу ў сістэме адукацыі па ўсім свеце. Па стане на сярэдзіну ліпеня школы былі закрыты ў больш як 160 краінах, што закранула амаль 1 млрд вучняў. Прынамсі, 40 млн дзяцей ва ўсім свеце не мелі магчымасці вучыцца ў крытычна важны дашкольны год. Бацькі, асабліва жанчыны, былі вымушаны ўзяць на сябе вялікі цяжар догляду дзяцей і навучання іх дома.
"Нягледзячы на правядзенне ўрокаў па радыё, тэлебачанні і ў інтэрнэце, а таксама на ўсе намаганні настаўнікаў і бацькоў, многія вучні па-ранейшаму застаюцца недасягальнымі, - падкрэсліў Антоніу Гутэрыш. - Вучні з абмежаванымі магчымасцямі, прадстаўнікі меншасцей і малазабяспечаных абшчын, бежанцы, жыхары аддаленых раёнаў найбольш рызыкуюць безнадзейна адстаць у навучанні".
Каб паспрабаваць выправіць гэту сітуацыю, Арганізацыя Аб'яднаных Нацый разам з міжнароднымі партнёрамі запускае кампанію пад назвай "Выратуйце нашу будучыню", якая складаецца з чатырох этапаў.
Па-першае, паводле слоў кіраўніка ААН, міжнароднай супольнасці неабходна дабіцца хутчэйшага адкрыцця школ. Пры гэтым трэба ацаніць рызыкі для здароўя, адзначыў Антоніу Гутэрыш.
Па-другое, як лічыць генеральны сакратар ААН, трэба ўдзяляць прыярытэтную ўвагу сферы адукацыі пры размеркаванні фінансавых патокаў. Да крызісу краіны з нізкім і сярэднім узроўнем даходу ўжо мелі дэфіцыт фінансавання адукацыі ў памеры $1,5 трлн за год. Цяпер гэты разрыў значна вырас. Бюджэты адукацыйных праграм павінны быць абаронены ад скарачэнняў і па магчымасці павялічаны, перакананы Антоніу Гутэрыш.
Па-трэцяе, на думку кіраўніка ААН, варта структураваць адукацыйныя ініцыятывы такім чынам, каб ахапіць тых, хто падпадае пад найбольшую рызыку адставання: дзяцей і падлеткаў, якія жывуць у зонах надзвычайных сітуацый і крызісаў, прадстаўнікоў розных меншасцей, а таксама вымушаных перасяленцаў і інвалідаў.
"Па-чацвёртае, - заявіў генеральны сакратар ААН. - Трэба разумець, што будучыня адукацыі ствараецца ўжо цяпер. У сучаснага пакалення ёсць магчымасць пераасэнсаваць педагагічныя метады і прынцыпы. Мы можам зрабіць крок у напрамку перспектыўных сістэм, якія забяспечваюць якасную адукацыю для ўсіх, - у якасці плацдарма для дасягнення глабальных мэт у галіне ўстойлівага развіцця. Мы жывём у паваротны для будучыні дзяцей і моладзі ўсяго свету момант. Рашэнні, якія асобныя краіны і міжнародныя арганізацыі прымаюць цяпер, будуць мець доўгатэрміновыя наступствы для лёсаў соцень мільёнаў маладых людзей і перспектыў развіцця свету на дзесяцігоддзі наперад".-0-
