22 студзеня, Масква /Эдуард Півавар - БЕЛТА/. Савет Федэрацыі Федэральнага сходу Расіі сёння на пленарным пасяджэнні назначыў новым генеральным пракурорам РФ Ігара Краснова, які да гэтага займаў пасаду намесніка кіраўніка Следчага камітэта. Сенатары таксама вызвалілі ад пасады генпракурора Юрыя Чайку, перадае карэспандэнт БЕЛТА.
Кандыдатура Ігара Краснова на пасаду генпракурора была ўнесена ў верхнюю палату парламента Прэзідэнтам Расіі Уладзімірам Пуціным 20 студзеня. Ранейшаму кіраўніку нагляднага ведамства Юрыю Чайку прапанавана заняць пасаду паўнамоцнага прадстаўніка Прэзідэнта РФ у Паўночна-Каўказскай федэральнай акрузе.
Пры абмеркаванні кандыдатуры Ігара Краснова парламентарыі адзначалі, што ў Следчым камітэце ён зарэкамендаваў сябе як сапраўдны прафесіянал. У яго паслужным спісе - расследаванні многіх гучных спраў, заблытаных злачынстваў. "Гэта дае падставы нам верыць, што ён справіцца з новымі абавязкамі, і пад яго кіраўніцтвам Генеральная пракуратура будзе працаваць рэзультатыўна", - заявіў кіраўнік Камітэта Савета Федэрацыі па абароне і бяспецы Віктар Бондараў.
Ігару Краснову 44 гады. З 1997 года ён служыў у органах пракуратуры. Пасля ўтварэння ў 2007 годзе Следчага камітэта перайшоў на работу ў гэта ведамства, дзе прайшоў шлях ад старшага следчага па асабліва важных справах пры старшыні Следчага камітэта да намесніка кіраўніка СК. На гэтай пасадзе Ігар Красноў курыраваў Галоўнае ўпраўленне па расследаванні асабліва важных спраў і Галоўнае следчае ўпраўленне. Ён расследаваў такія крымінальныя справы, як замах на Анатоля Чубайса, забойствы Барыса Нямцова, адваката Станіслава Маркелава і журналісткі Настассі Бабуравай, крадзяжы пры будаўніцтве на касмадроме Усходні.-0-
