30 верасня, Мінск /Кар. БЕЛТА/. Лававы паток ад вулкана на іспанскім востраве Пальма, які дасягнуў акіяна, утварыў невысокі востраў. Аб гэтым сказаў вулканолаг Вышэйшага савета па навуковых даследаваннях Іспаніі Вісентэ Салер, паведамляе ТАСС.
Паводле яго слоў, кантакт лавы з вадой, які адбыўся ў ноч з 28 на 29 верасня, прывёў да ўтварэння вострава шырынёй больш за паўкіламетра. Як перадае тэлерадыёкампанія RTVE, падзенне гарачай вулканічнай масы ў акіян павялічыла плошчу Пальмы прыблізна на 10 га. Пры гэтым вада вакол новаўтворанай тэрыторыі змяніла колер.
19 верасня на Пальме пачалося вывяржэнне вулкана ў раёне населенага пункта Эль-Паса. З кратара вулкана адбываецца актыўны выкід вулканічных матэрыялаў. Патокі лавы ўжо разбурылі сотні дамоў, па меркаваннях бяспекі былі эвакуіраваны амаль 6 тыс. чалавек. Пакуль ніхто не пацярпеў.
Кантакт лавы з салёнай вадой можа справакаваць узрывы і выкіды шкодных газаў. Раней улады загадалі жыхарам некаторых муніцыпалітэтаў схавацца дома, а таксама забаранілі суднам уваход у акваторыю на адлегласці амаль 4 км па меркаваннях бяспекі. Паводле даных мясцовых улад, пакуль вывяржэнне вулкана не паўплывала на якасць паветра на Пальме.-0-
