23 кастрычніка, Мінск /Кар. БЕЛТА/. Валейбалісты гомельскай "Энергіі" абыгралі мінскі МАПІД у першым чвэрцьфінальным матчы Кубка Беларусі. Гульня ў сталіцы завяршылася на карысць падапечных Рамана Аплевіча з лікам 3:0 (25:20, 25:19, 25:23), паведамляе карэспандэнт БЕЛТА.
Галоўным козырам гомельскай дружыны стала падача, дзякуючы якой "Энергія" змагла перанесці гульню ад сеткі і арганізаваць эфектыўныя дзеянні блока. Найбольш упартай атрымалася заключная партыя, у якой мінчане мелі ўсе шанцы на перамогу, аднак гамяльчане справіліся з цяжкасцямі і адолелі саперніка. Самым рэзультатыўным іграком стаў Ілья Марозаў з МАПІДа: на яго рахунку 19 рэзультатыўных дзеянняў, у тым ліку пяць эйсаў і тры блокі. У радах пераможцаў 16 ачкоў зарабіў Арцём Масько.
Матч у адказ адбудзецца ў Гомелі. Пераможца гэтага процістаяння ў паўфінале сустрэнецца з салігорскім "Шахцёрам", які па суме двух матчаў абыграў брэсцкі "Заходні Буг" (3:0, 3:0).
Удзельнікам вырашальнай стадыі турніру мінскі "Будаўнік", як арганізатар "Фіналу чатырох". Яшчэ адна дружына ў квартэце мацнейшых будзе вядома пасля паядынкаў паміж "Легіёнам" (Абухава) і "Марко-ВДТУ" (Віцебск).-0-
