10 чэрвеня, Мінск /Кар. БЕЛТА/. Кубак Беларусі па боксе плануецца правесці 6-11 ліпеня ў Гомелі. Аб гэтым карэспандэнту БЕЛТА паведаміў выканаўчы дырэктар Беларускай федэрацыі бокса Дзяніс Сабалеўскі.
"Гэта будуць першыя спаборніцтвы для нацыянальнай каманды пасля доўгага прастою. Турнір стане адборачным для маладых спартсменаў на Гульні краін СНД, якія павінны прайсці ў верасні", - сказаў Дзяніс Сабалеўскі. Ён таксама адзначыў, што восенню запланаваны чэмпіянат Беларусі, мемарыял Віктара Лівенцава.
Цяпер беларускія баксёры знаходзяцца ў "Стайках" на зборы, які прадоўжаны да 30 чэрвеня. Там створаны ўсе ўмовы для трэніровак.
Паводле слоў Дзяніса Сабалеўскага, вялікая ўвага надаецца і падрыхтоўцы да сусветнага форуму. Атлеты, якія прадставяць Беларусь на ім, вызначацца бліжэй да дат правядзення.
Як паведамлялася, чэмпіянат свету па боксе ў 2021 годзе быў перанесены ў Бялград (Сербія). Першапачаткова планетарны форум павінен быў адбыцца ў Нью-Дэлі (Індыя), аднак перанесены па прычыне невыканання арганізатарамі сваіх абавязацельстваў. Індыйскі бок не аплаціў неабходны ў такіх выпадках узнос, і Міжнародная асацыяцыя бокса (AIBA) скасавала кантракт. Цяпер Федэрацыі бокса Індыі трэба будзе заплаціць штраф за адмену спаборніцтваў.
У сувязі з пераносам Алімпійскіх гульняў 2020 года і пандэміяй каранавіруса тэрміны правядзення ЧС-2021 будуць агавораны з арганізатарамі дадаткова.
Міжнародны алімпійскі камітэт 30 лістапада 2018 года паставіў пад сумненне правядзенне баксёрскага турніру на Алімпійскіх гульнях 2020 года. Рашэнне было прынята пасля расследавання ў адносінах да AIBA. У маі 2019 года МАК прыняў рашэнне захаваць старты баксёраў на Гульнях у Токіа. Пры гэтым AIBA была пазбаўлена статусу прызнання, таму што не змагла выканаць патрабаванні МАК, якія датычыліся фінансаў, кіравання, судзейства і этыкі, а місія арганізацыі кваліфікацыйных стартаў і турніру ў Токіа была ўскладзена на спецыяльна створаную МАК рабочую групу на чале з прэзідэнтам Міжнароднай федэрацыі гімнастыкі і членам МАК з Японіі Марынары Ватанабе.-0-
