6 чэрвеня, Магілёў /Кар. БЕЛТА/. У Горках на чэмпіянаце Следчага камітэта па міні-футболе вызначылі мацнейшых спартсменаў. Аб гэтым БЕЛТА паведаміла афіцыйны прадстаўнік УСК па Магілёўскай вобласці Таццяна Старасотнікава.
Чэмпіянат прайшоў у спартыўным комплексе "Лядовы палац". У ім удзельнічалі зборныя каманды ўпраўленняў па абласцях і горадзе Мінску, а таксама цэнтральнага апарату ведамства.
"Правядзенне чэмпіянату даўно стала добрай традыцыяй у падраздзяленнях Следчага камітэта, паколькі мерапрыемства садзейнічае фарміраванню здаровага ладу жыцця, вынослівасці, згуртаванасці ў калектывах і дае магчымасць стасункаў не толькі ў рабочай атмасферы, але і за яе межамі", - сказала Таццяна Старасотнікава.
Спаборніцтвы прадаўжаліся тры дні. Пераможцаў вызначалі як у камандным, так і асабістым заліку. Па выніках чэмпіянату 3-е месца заняла каманда цэнтральнага апарату Следчага камітэта, сярэбраным прызёрам стала зборная каманда УСК па Гродзенскай вобласці. Званне чэмпіёна Следчага камітэта па міні-футболе заваявала каманда УСК па Магілёўскай вобласці. Лепшым іграком чэмпіянату прызнаны Мікалай Салдаценка (УСК па Гродзенскай вобласці), лепшым варатаром - Яўген Скрыган (УСК па Мінскай вобласці), а лепшым бамбардзірам - Алег Гурын (УСК па Магілёўскай вобласці).
Дыпломам "За волю да перамогі" адзначана каманда УСК па Віцебскай вобласці. Уладальнікам спецыяльнага дыплома "Адкрыццё чэмпіянату" стала Паліна Снітко з каманды УСК па Гродзенскай вобласці.
Падводзячы вынікі спаборніцтваў, старшыня Следчага камітэта Дзмітрый Гара адзначыў высокі ўзровень правядзення мерапрыемства, падзякаваў кіраўніцтву раёна і рэктару Беларускай дзяржаўнай сельскагаспадарчай акадэміі за дружалюбны прыём і насычаную культурную праграму чэмпіянату. На ўрачыстай цырымоніі закрыцця чэмпіянату адбылося ўзнагароджанне пераможцаў, прызёраў, лепшых ігракоў.-0-
