16 снежня, Мінск /Кар. БЕЛТА/. Калядны турнір па боўлінгу па праграме Special Olympics праходзіць у сталічным ГЗЦ "Тытан", паведамляе
карэспандэнт БЕЛТА.
За перамогу спрачаюцца восем дружын са школ-інтэрнатаў і дамоў-інтэрнатаў для асоб з асаблівасцямі псіхафізічнага развіцця, падзеленыя на два дывізіёны. Каманды падлеткаў ад 14 гадоў упершыню спрабуюць свае сілы ў папулярнай спартыўнай гульні, а таму ўважліва слухалі інструктаж галоўнага суддзі спаборніцтваў і сачылі за майстар-класам ад Беларускай федэрацыі боўлінга. Потым настаў час дэманстраваць сваё майстэрства.
Падлеткі з задавальненнем гулялі, размаўляючы адзін з адным і іншымі наведвальнікамі ГЗЦ. Важна не столькі тое, хто перамог, а тое, што гульня дорыць радасць, дапамагае дзецям быць часткай соцыуму.
Выканаўчы дырэктар ГА "Беларускі камітэт "Спешыял Алімпікс" Ларыса Таболіна расказала журналістам: "Усе нашы мерапрыемствы накіраваны на сацыяльную адаптацыю і інтэграцыю дзяцей у грамадства. Важна, каб яны размаўлялі, атрымлівалі магчымасць паказаць, што яны могуць дасягнуць рэзультатаў у спорце. Сёння тут шмат людзей, якія проста прыйшлі пагуляць, і дзеці могуць нараўне з усімі паказаць, што ў іх атрымліваецца. Першы раз мы правялі спаборніцтвы па боўлінгу па праграме Special Olympics некалькі месяцаў таму. Тады прысутнічалі толькі тры каманды. Цяпер дзякуючы таму, што мы падпісалі мемарандум і супрацоўнічаем з Прэзідэнцкім спартыўным клубам, у нас з'явілася магчымасць правесці па-сапраўднаму вялікі турнір. І няхай з-за эпідсітуацыі прыехалі восем каманд, а не 10, як было задумана".
Прэзідэнцкі спартыўны клуб і Беларускі камітэт "Спешыял Алімпікс" падпісалі мемарандум аб супрацоўніцтве 20 кастрычніка 2020 года. "Спешыял Алімпікс" праводзіць шырокамаштабную работу па сацыяльнай рэабілітацыі асоб з асаблівасцямі інтэлекту праз заняткі спортам. Штогод аб'яднанне арганізуе рэгіянальныя і рэспубліканскія спаборніцтвы па футболе, баскетболе, настольным тэнісе, плаванні, лёгкай атлетыцы і іншых спецыяльных алімпійскіх відах спорту. Ёсць спартыўныя трэніроўкі і адборачныя спаборніцтвы для падрыхтоўкі зборнай Беларусі да еўрапейскіх і міжнародных спецыяльных Алімпійскіх гульняў. Прэзідэнцкі спартыўны клуб выступае ў падтрымку спецыяльнага алімпійскага руху, які ўносіць неацэнны ўклад у адаптацыю людзей з парушэннямі інтэлектуальнага развіцця і ў пабудову інклюзіўнага свету.-0-
