8 лістапада, Мінск /Кар. БЕЛТА/. Футбалісткі мінскага "Дынама-БДУФК" у рангу двухразовых чэмпіёнак Беларусі разграмілі каманду Гомельскай вобласці з лікам 16:0 у перадапошнім туры 30-га нацыянальнага першынства, паведамляе карэспандэнт БЕЛТА.
У дамашняй гульні з адным з аўтсайдараў турніру падапечныя Юрыя Малеева ў кожным тайме забілі па восем мячоў. Галявыя дублі ў свой актыў запісалі Карына Альховік, Ганна Піліпенка, Настасся Новікава, Вікторыя Валюк, Настасся Ліннік і Таццяна Маркушэўская. Пасля гэтай сустрэчы адбылася цырымонія ўзнагароджвання футбалістак "Дынама-БДУФК", у якой прыняў удзел намеснік старшыні асацыяцыі "Беларуская федэрацыя футбола" Міхаіл Вергеенка. Дынамаўская каманда другі раз запар заваявала чэмпіёнскі тытул. У гэтым сезоне мінчанкі атрымалі перамогі ва ўсіх 26 праведзеных матчах, забіўшы 187 мячоў і прапусціўшы ў свае вароты ўсяго 4 галы. У гэтым сезоне яны таксама сталі ўладальніцамі Суперкубка і Кубка краіны.
Другое месца забяспечылі сабе спартсменкі "Мінска" - разграмілі ў Магілёве мясцовы "Днепр" з вынікам 4:1. Мінчанкі выйгралі 23 сустрэчы, уступіўшы толькі ў трох гульнях з чэмпіёнкамі.
У паядынку двух саіскальнікаў бронзавых узнагарод футбалісткі гродзенскага "Нёмана" ў сябе дома адолелі мінскую "Зорку-БДУ" з мінімальнай перавагай у ліку 1:0 дзякуючы голу Наталлі Качан. І падняліся на трэцяе месца ў турнірнай табліцы. Перад сустрэчамі апошняга тура гродзенская каманда апярэджвае мінчанак усяго на адзін бал. Пытанне аб уладальніку бронзы вырашыцца ў суботу, 13 лістапада, калі "Нёман" згуляе на выездзе супраць "Мінска", а "Зорка-БДУ" прыме на сваім полі футбалістак "Бабруйчанкі".
Пасля 26 тураў становішча ў лідзіруючай групе такое: "Дынама-БДУФК" - 78 ачкоў, "Мінск" - 69, "Нёман" - 50, "Зорка-БДУ" - 49. Унізе турнірнай табліцы брэсцкае "Дынама", у якога ўсяго 3 балы, у актыве гамяльчанак 6 ачкоў.
Спіс лепшых снайпераў беларускага чэмпіянату ўзначальвае Мелана Суроўцава ("Мінск"), якая забіла 33 галы.-0-
