3 снежня, Мінск /Кар. БЕЛТА/. Брэсцкі гандбольны клуб імя Мяшкова атрымаў перамогу над маскоўскім "Спартаком" у матчы SEHA-лігі, паведамляе карэспандэнт БЕЛТА.
З самага пачатку гасцявога паядынку брастаўчане ўзялі ініцыятыву ў свае рукі і без асаблівых праблем перамаглі - 34:26 (17:13). У БГК рэзультатыўнасцю адзначыўся Максім Баранаў, які закінуў 13 мячоў.
У першым крузе папярэдняга этапу чэмпіёны Беларусі перамаглі спартакаўцаў у Брэсце з рэзультатам 35:24.
Турнірнае становішча ў групе В SEHA-лігі цяпер такое: "Веспрэм" (Венгрыя) - 18 ачкоў (7 матчаў), БГК імя Мяшкова - 15 (8), "Заграб" - 12 (6), "Еўрафарм Работнік" (Паўночная Македонія ) - 9 (7), "Металапластыка" (Сербія) - 9 (8), "Спартак" (Расія) - 3 (8). За перамогу ў матчах гэтага турніру каманда атрымлівае 3 ачкі, за нічыю - 1, за паражэнне - 0.
Свой наступны матч SEHA-лігі брастаўчане правядуць 10 снежня на сваёй арэне супраць "Металапластыкі" з Шабаца. У першым крузе сербы ў сябе дома перамаглі БГК з лікам 35:33.
У групе А становішча каманд пасля сямі тураў такое: "Вардар" (Паўночная Македонія) - 18, "Матор" (Украіна) - 15, "Вайводзіна" (Сербія) - 12, "Татран" (Славакія) - 12, "Нексе" (Харватыя) - 6, "Пекін" (Кітай) - 0.
Пасля фінішу групавога этапу па дзве лепшыя каманды з кожнай групы адразу трапляюць у чвэрцьфінальную стадыю. Яшчэ чатыры пуцёўкі ў 1/4 фіналу разыграюць клубы, якія зоймуць 3-6-я месцы. Па выніках чвэрцьфінальных сустрэч вызначыцца квартэт, які ў пачатку красавіка 2020 года згуляе ў "фінале чатырох".
У мінулым сезоне вырашальны этап SEHA-лігі праходзіў у Брэсце. Пераможцам стаў "Вардар", які перамог у фінальным паядынку "Заграб" з лікам 26:23. БГК імя Мяшкова заваяваў бронзу, перамогшы "Нексе" - 24:19. Гандбалісты "Вардара" з'яўляюцца пяціразовымі трыумфатарамі гэтых спаборніцтваў, двойчы чэмпіёнам станавіўся "Веспрэм", адзін тытул у "Заграба".-0-
