18 чэрвеня, Мінск /Кар. БЕЛТА/. Беларускія валейбалісткі згуляюць з Чэхіяй першы матч "Фіналу чатырох" залатой Еўралігі, паведамляе карэспандэнт БЕЛТА.
У штаб-кватэры Еўрапейскай канфедэрацыі валейбола (ЕКВ) 17 чэрвеня адбылася жараб'ёўка вырашальнай стадыі турніру. Беларуская і чэшская каманды выйдуць на пляцоўку спарткомплексу ў харвацкім Вараждзіне 21 чэрвеня ў 17.00, у другім паўфінале згуляюць Харватыя і Іспанія (20.00). Матчы за першае і трэцяе месцы адбудуцца 22 чэрвеня.
Жаночая зборная Беларусі па валейболе ўпершыню выйшла ў "Фінал чатырох" Еўралігі. Раней лепшым дасягненнем спартсменак у гэтым турніры было шостае месца ў 2017 і 2018 гадах.
Мужчынская нацыянальная зборная 21 чэрвеня ў 16.00 правядзе паўфінальны матч залатой Еўралігі ў Таліне супраць сапернікаў з Нідэрландаў, у другой гульні сустрэнуцца Турцыя і Эстонія (19.00). Вырашальныя матчы, па выніках якіх будуць размеркаваны месцы, адбудуцца 22 чэрвеня.
Беларускія валейбалісты восьмы раз удзельнічаюць у Еўралізе. Найбольш высокі рэзультат яны паказалі ў 2008 годзе, заняўшы пятае месца.
Галоўным стартам сезона для зборных Беларусі па валейболе стане чэмпіянат Еўропы. Жанчыны згуляюць у Браціславе ў канцы жніўня ў групе D з Расіяй, Іспаніяй, Славакіяй, Германіяй і Швейцарыяй, мужчыны - у верасні ў Любляне са Славеніяй, Турцыяй, Расіяй, Фінляндыяй і Македоніяй.-0-
