10 чэрвеня, Мінск /Кар. БЕЛТА/. Баскетбалісткі зборнай Беларусі другі раз прайгралі расіянкам у спарынгу, паведамляе карэспандэнт БЕЛТА.
Учора падапечныя Наталлі Трафімавай уступілі расійскім баскетбалісткам усяго тры ачкі (67:70), а сёння прайгралі з розніцай 9 балаў - 56:65 (10:20, 10:15, 19:14, 17:16). Самай рэзультатыўнай у складзе беларусак стала Марыя Папова, якая набрала 19 ачкоў.
Матчы з расійскай камандай сталі для беларусак апошняй праверкай сіл перад ад'ездам на чэмпіянат Еўропы. У хуткім часе зборная Беларусі возьме курс на іспанскую Валенсію, дзе 17 чэрвеня прыме старт у 38-м жаночым чэмпіянаце Еўропы. У першым паядынку папярэдняй групы А беларускі згуляюць з дзеючым чэмпіёнам Старога Свету камандай Іспаніі, 18 чэрвеня падапечныя Наталлі Трафімавай сустрэнуцца са зборнай Славакіі, а 20 чэрвеня завершаць групавы этап матчам з камандай Швецыі.
Пасля фінішу першага этапу пераможцы чатырох квартэтаў атрымаюць прамыя пуцёўкі ў чвэрцьфінал. Каманды, якія зоймуць другія і трэція месцы, 21 чэрвеня правядуць кваліфікацыйныя паядынкі за выхад у 1/4 фіналу. Чвэрцьфіналы пройдуць 23 чэрвеня, паўфіналы - 26 чэрвеня, фінал і матч за бронзу адбудуцца 27 чэрвеня. Паядынкі фінальнай стадыі жаночага Еўрабаскета прымуць іспанская Валенсія і французскі Страсбург.
На мінулым чэмпіянаце Еўропы два гады таму золата заваявалі баскетбалісткі Іспаніі, якія разграмілі ў фінале францужанак, - 86:66, бронзавым прызёрам стала зборная Сербіі, яна перамагла ў гульні за трэцяе месца каманду Вялікабрытаніі, - 81:55. Зборная Беларусі выступіла няўдачна, не здолеўшы пераадолець групавы этап. Лепшым дасягненнем беларускіх баскетбалістак з'яўляецца трэцяе месца, якое яны занялі ў 2007 годзе на дэбютным для сябе першынстве, якое праходзіла ў Італіі.-0-
