26 чэрвеня, Мінск /Кар. БЕЛТА/. Беларуская тэнісістка Вікторыя Азаранка (58-ы нумар сусветнага рэйтынгу) прайграла на старце выставачнага турніру Credit One Bank Invitational у амерыканскім Чарлстане, паведамляе карэспандэнт БЕЛТА.
У сваім першым адзіночным паядынку Вікторыя Азаранка ўступіла амерыканскай тэнісістцы Джэніфер Брэдзі (48) у двух сэтах - 3:6, 2:6. Сустрэча прадаўжалася 1 гадзіну 15 мінут. Наступнай саперніцай беларускі будзе яшчэ адна прадстаўніца ЗША Даніэль Колінз (51).
У парным матчы Вікторыя Азаранка і амерыканка Мэдзісан Кіз ва ўпартай барацьбе прайгралі амерыканскаму дуэту Сафія Кенін / Бетані Матэк-Садс - 2:6, 6:1, 7:10.
Спаборніцтвы ў Чарлстане завершацца 28 чэрвеня.
Раней міжнародныя тэнісныя арганізацыі (ITF, ATP, WTA) у сувязі з пандэміяй COVID-19 адмянілі ўсе афіцыйныя спаборніцтвы да жніўня. Плануецца, што жаночы сезон адновіцца 3 жніўня турнірам у італьянскім Палерма, у мужчын рэстарт запланаваны на 14 жніўня на спаборніцтвах у амерыканскім Вашынгтоне.-0-
