25 мая, Мінск /Кар. БЕЛТА/. У мінулы ўік-энд у Рэчыцы з поспехам прайшоў стартавы этап новага сезона культурна-спартыўнага фестывалю "Вытокi. Крок да Алiмпу", а цяпер эстафету прымае Брэсцкая вобласць - 3 і 4 чэрвеня свята пройдзе ў Століне, паведамілі БЕЛТА ў прэс-службе Нацыянальнага алімпійскага камітэта.
Такі выбар невыпадковы - гэты самабытны горад мае цікавую гісторыю і багатую культурную спадчыну, з якой на працягу двух дзён змогуць азнаёміцца ўдзельнікі і госці фестывалю. Ён адкрыецца прэс-турам для прадстаўнікоў рэспубліканскіх і рэгіянальных СМІ, арганізатараў і ўдзельнікаў. Першы дзень фестывалю прадоўжыцца семінарам "Актуальныя пытанні падрыхтоўкі спартсменаў і шляхі іх вырашэння" з удзелам спецыялістаў БДУФК, Вышэйшай школы трэнераў, а таксама прадстаўнікоў спартыўных арганізацый Брэсцкай вобласці. Цікавым будзе і семінар-практыкум Беларускай алімпійскай акадэміі, удзельнікі якога азнаёмяцца з алімпійскімі каштоўнасцямі і дасягненнямі беларускіх атлетаў на алімпіядах. У Доме культуры Століна адбудзецца майстар-клас па набіванцы "Маляванка. Вытокі самабытнага мастацтва", дзе наведвальнікі змогуць азнаёміцца з творчасцю самадзейных майстроў і сучасных аўтараў гэтага віду дэкаратыўна-прыкладнога мастацтва, а таксама стварыць памятны сувенір сваімі рукамі. Завершыцца першы дзень фестывалю канцэртам арганнай музыкі Валерыя Шмата.
У другі дзень свята, 4 чэрвеня, цэнтральнай пляцоўкай стане плошча Леніна. Кожны жадаючы атрымае магчымасць прыняць удзел у алімпійскім квесце, паспрабаваць сябе ў спартыўных конкурсах, выканаць заданні і атрымаць каштоўныя прызы. Спартыўныя пляцоўкі будуць арганізаваны па 30 відах спорту. Для ўдзельнікаў будуць працаваць фуд-корт, зона сямейнага адпачынку і выстаўка-продаж "Беларускія брэнды".
Акрамя таго, свой стэнд плануе выставіць Міністэрства па надзвычайных сітуацыях. У Столін прыедзе і гоначны грузавік каманды "МАЗ-СПОРТаўта", а таксама будзе працаваць інтэрактыўная зона VOKA Games з развіваючымі камп'ютарнымі гульнямі. Будзе арганізавана пляцоўка беларускай алімпійскай акадэміі, Рэспубліканскага навукова-практычнага цэнтра спорту і Нацыянальнага антыдопінгавага агенцтва.
Таксама ў заключны дзень фестывалю адбудзецца прэзентацыя калекцый адзення праекта "Роднае моднае" ад беларускіх прадпрыемстваў, дызайнераў і прадпрымальнікаў. Наведвальнікі змогуць набыць прадукцыю айчынных дызайнераў і прадпрыемстваў. Дэбют гэтага праекта адбыўся ў Рэчыцы.
На галоўнай сцэнічнай пляцоўцы пройдзе конкурс маладых вакалістаў. Яго лаўрэаты атрымаюць дыпломы і прызы, а ў далейшым прымуць удзел у майстар-класах вядучых настаўнікаў краіны. Фестывальная праграма ў Століне завершыцца вячэрнім гала-канцэртам з удзелам папулярных артыстаў беларускай эстрады. Уваход на ўсе мерапрыемствы бясплатны.
У Століна эстафету фестывалю "Вытокі. Крок да Алімпу" прыме Навагрудак (17-18 чэрвеня), а потым святы пройдуць у Горках (22-23 ліпеня), Полацку (12-13 жніўня) і Капылі (26-27 жніўня). Галоўная мэта праекта - раскрыццё патэнцыялу рэгіёна праз спорт, культуру, навуку і адукацыю.
Арганізатары фестывалю - Нацыянальны алімпійскі камітэт, Федэрацыя прафсаюзаў, ТАА "АртХаос" і ТАА "БелБрэндАўдыт".-0-