Высокакваліфікаваным работнікам-іншаземцам могуць спрасціць атрыманне дазволу на пастаяннае пражыванне ў Беларусі 

13 студзеня, Мінск /Кар. БЕЛТА/. Высокакваліфікаваным работнікам-іншаземцам могуць спрасціць атрыманне дазволу на пастаяннае пражыванне ў Беларусі. Гэта прадугледжана праектам закона "Аб змяненні законаў па пытаннях дзяржаўнай дактыласкапічнай рэгістрацыі", які прыняты сёння дэпутатамі ў другім чытанні, перадае карэспандэнт БЕЛТА. 

"У адносінах да замежных грамадзян і асоб без грамадзянства, якія з'яўляюцца высокакваліфікаванымі работнікамі, прапануецца адмяніць патрабаванне аб трохгадовым тэрміне бесперапыннага пражывання ў Рэспубліцы Беларусь для атрымання імі дазволу на пастаяннае пражыванне", - сказаў член Пастаяннай камісіі Палаты прадстаўнікоў па нацыянальнай бяспецы Міхаіл Аксянюк, прадстаўляючы законапраект. 

Дэпутат растлумачыў, што прапанова адмяніць названае патрабаванне з'явілася пры дапрацоўцы законапраекта да другога чытання. 

Гаворачы аб іншых навацыях праекта, Міхаіл Аксянюк адзначыў, што органы пагранічнай службы надзяляюцца паўнамоцтвамі на правядзенне дактыласкапічнай рэгістрацыі грамадзян пры перасячэнні дзяржаўнай граніцы. Вызначана катэгорыя грамадзян, якія будуць праходзіць такую рэгістрацыю. 

Органам пагранічнай службы і мытным органам прадастаўляецца права ажыццяўляць асабісты надгляд грамадзян у пунктах пропуску. Да гэтага такой нормы не было, растлумачыў дэпутат. 

У каментарыі журналістам член пастаяннай камісіі адзначыў, што не кожны іншаземец, які ўязджае або пакідае Беларусь, будзе праходзіць дактыласкапічную рэгістрацыю. Яе абавязкова правядуць, напрыклад, у адносінах да асоб, якім забаронены ўезд у Беларусь, - пры выяўленні іх у пункце пропуску. Што датычыцца астатніх замежных грамадзян, дактыласкапічная рэгістрацыя - па рашэнні ўпаўнаважаных службовых асоб пры наяўнасці падстаў меркаваць, што гэтымі іншаземцамі можа быць нанесены ўрон Рэспубліцы Беларусь. 

"Гэта не значыць, што прыбыў самалёт, у якім 190 чалавек, і кожнага іншаземца пайшлі дактыласкапіраваць. Абсалютна не. Гэта права органаў пагранічнай службы, але не абавязак", - заўважыў парламентарый. 

Хавальнікамі і распарадчыкамі базы дактыласкапічнай рэгістрацыі, якую яны правялі, будуць органы пагранічнай службы. Законапраектам таксама вызначаны парадак карыстання гэтай базай іншымі дзяржаўнымі органамі. 

"Учора Прэзідэнтам Рэспублікі Беларусь былі зацверджаны рашэнні на ахову дзяржаўнай граніцы Рэспублікі Беларусь, - звярнуў увагу парламентарый. - Лічу, што прыняцце гэтага законапраекта павысіць эфектыўнасць вырашэння задач органамі пагранічнай службы пры ахове дзяржаўнай граніцы".-0-