18 мая, Гродна /Кар. БЕЛТА/. Дзяржаўны сакратар Савета бяспекі Аляксандр Вальфовіч 18 мая прыняў удзел у пасяджэнні Гродзенскага аблвыканкама па пытанні сацыяльна-эканамічнага развіцця вобласці ў першым квартале бягучага года, перадае карэспандэнт БЕЛТА.
Дзяржаўны сакратар Савета бяспекі, які з'яўляецца ўпаўнаважаным прадстаўніком кіраўніка дзяржавы ў Гродзенскай вобласці, у сваім выступленні падкрэсліў, што ў існуючых умовах важна аб'ектыўна ацэньваць сітуацыю, загадзя прымаць меры па забеспячэнні эканамічнай бяспекі.
Сёння кіраўніцтвам краіны ўдзяляецца сур'ёзная ўвага падтрымцы эканомікі. Распрацоўваюцца нарматыўныя прававыя акты, накіраваныя на стварэнне больш прымальных умоў дзейнасці суб'ектаў гаспадарання, лібералізацыю падатковага і мытнага заканадаўства, спрашчэнне сертыфікацыі і ліцэнзавання, стымуляванне інвестыцыйнай дзейнасці.
"Нават у няпростых умовах санкцый, знешнепалітычнага і інфармацыйнага націску наша краіна заўсёды імкнулася наладзіць добрасуседскія і ўзаемавыгадныя адносіны з сумежнымі краінамі. Менавіта таму кіраўніком дзяржавы прынята рашэнне прадоўжыць да канца года дзеянне бязвізавага рэжыму для грамадзян Літвы і Латвіі, - адзначыў Аляксандр Вальфовіч. - Нягледзячы на існуючыя цяжкасці, забяспечана выкананне важнейшых мэтавых паказчыкаў сацыяльна-эканамічнага развіцця рэгіёна".
Разам з тым дзяржаўны сакратар Савета бяспекі адзначыў неабходнасць нарошчвання намаганняў па прыцягненні інвестыцый у асноўны капітал, вырашэння праблем занятасці насельніцтва і скарачэння некантралюемай працоўнай міграцыі.
На заканчэнне выступлення Аляксандр Вальфовіч падкрэсліў: "Дзяржава мае неабходныя і дастатковыя рэсурсы для забеспячэння бяспекі грамадзян, захавання міру і стабільнасці ў краіне. Наша здольнасць процістаяць усебаковаму знешняму націску залежыць ад ролі кожнага дзяржаўнага органа, арганізацыі, пазіцыі кожнага чалавека. Не трэба чакаць указанняў зверху. Усім неабходна прымаць самастойныя рашэнні ў рамках сваёй кампетэнцыі".-0-
