27 чэрвеня, Мінск /Кар. БЕЛТА/. Міністэрства па надзвычайных сітуацыях можа забяспечваць абарону нацыянальных інтарэсаў Беларусі. Аб гэтым журналістам у час тактыка-спецыяльных вучэнняў МНС расказаў дзяржаўны сакратар Савета бяспекі Аляксандр Вальфовіч, перадае карэспандэнт БЕЛТА.
Паводле слоў Аляксандра Вальфовіча, патрабаванне кіраўніка дзяржавы заключалася ў тым, каб у забеспячэнні правапарадку былі задзейнічаны сілы Міністэрства па надзвычайных сітуацыях. "Вядома, іх асноўная задача - ліквідацыя наступстваў НС тэхнагеннага характару, тушэнне пажараў, выратаванне людзей і гэтак далей. Аднак МНС выдадзена стралковая зброя, і яны здольны ўзмацніць сілы і сродкі МУС, пры неабходнасці тэрытарыяльныя войскі, а таксама забяспечыць абарону нацыянальных інтарэсаў краіны для бяспекі нашых грамадзян, - адзначыў дзяржаўны сакратар. - Акрамя знешняга націску, які цяпер пагражае бяспецы нашай краіны, апаненты, збеглыя і кіраўніцтва Захаду спрабуюць пастаянна дыскрэдытаваць абстаноўку ўнутры краіны".
Адным з элементаў забеспячэння грамадскай бяспекі ў Беларусі з'яўляецца зладжанае прымяненне і дзеянне сіл і сродкаў сістэм нацыянальнай бяспекі. Гэта датычыцца Міністэрства ўнутраных спраў, органаў пагранічнай службы, Камітэта дзяржбяспекі, Узброеных Сіл. "Сёння на вучэннях мы ўбачылі дэманстрацыю непасрэдных задач супрацоўнікаў МНС - ліквідацыю наступстваў рознага характару, тушэнне пажараў рознай інтэнсіўнасці. На экспазіцыі былі прадстаўлены практычна ўсе ўзоры сучаснай тэхнікі МНС беларускай вытворчасці", - расказаў Аляксандр Вальфовіч.
Тактыка-спецыяльныя вучэнні МНС прайшлі на базе філіяла "Інстытут перападрыхтоўкі і павышэння кваліфікацыі" Універсітэта грамадзянскай абароны МНС. На палігоне аператыўна-тактычнай падрыхтоўкі ратавальнікаў былі паказаны сучасныя спосабы і метады вядзення аварыйна-выратавальных работ пры ліквідацыі надзвычайных сітуацый, якія могуць узнікнуць пры ўчыненні актаў тэрарызму, аварый і наступстваў стыхійных бедстваў.
Дзяржаўны сакратар Савета бяспекі азнаёміўся са спецыфікай работы выпрабавальна-даследчага палігона НДІ пажарнай бяспекі і праблем надзвычайных сітуацый, з новымі ўзорамі аварыйна-выратавальнай тэхнікі. Асаблівая ўвага была ўдзелена павышэнню ўзроўню ўзаемадзеяння дзяржаўных органаў і арганізацый, сумесная дзейнасць якіх накіравана на вырашэнне задач па забеспячэнні грамадскай бяспекі.-0-
