1 чэрвеня, Мінск /Кар. БЕЛТА/. Узроўні вады на рэках Беларусі ў чэрвені чакаюцца ніжэйшыя за сярэднія шматгадовыя значэнні для гэтай пары года, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
На Нёмане, Дняпры, Бярэзіне і Сожы ля Гомеля ўзроўні вады будуць блізкія да сярэдніх, а на Прыпяці - ніжэйшыя за іх. Узроўні вады апусцяцца ніжэй за адзнакі, якія лімітуюць суднаходства, на Бярэзіне каля Светлагорска, Прыпяці каля Мазыра і вёскі Чэрнічы. "У выпадку дэфіцыту ападкаў насычэнне рэк будзе адбывацца грунтавымі водамі глыбокіх гарызонтаў, захаваецца нізкая воднасць рэк, што пагоршыць іх экалагічны стан і навігацыю", - адзначылі ў Белгідрамеце.
У першай палавіне мая выпаданне ападкаў павысіла ўзроўні вады на большасці рэк краіны, у выніку чаго на суднаходных участках Дняпра, Бярэзіны і Сожа на непрацяглы час палепшыліся ўмовы для работы рачнога транспарту. У другой палавіне месяца на рэках адзначаліся ваганні ўзроўняй вады з тэндэнцыяй да іх паніжэння, на Дняпры каля Магілёва, Бярэзіне каля Бабруйска, Сожы каля Крычава і Слаўгарада пагоршыліся ўмовы для работы рачнога транспарту.
Узроўні вады ў бягучым месяцы былі блізкія да шматгадовых значэнняў за май на рэках басейнаў Нёмана, Віліі, Заходняга Буга, Дняпра, Бярэзіны і Сожа, а ў басейне Прыпяці яны апусціліся ніжэй за шматгадовыя мінімумы. Воднасць на рэках Гомельскай вобласці была меншай за звычайную для гэтай пары года на 60-80 працэнтаў, у астатняй часткі краіны - на 20-50 працэнтаў.
Па стане на 28 мая, на рэках назіраецца ў асноўным спад узроўняй вады і роўны іх ход. Узроўні вады знаходзяцца ніжэй за адзнакі, пры якіх узнікаюць цяжкасці ў рабоце рачнога транспарту, на Нёмане ля Гродна, Дняпры ля Магілёва, Бярэзіне ля Бабруйска, Сожы ля Крычава і Слаўгарада.-0-
