27 чэрвеня, Мінск /Кар. БЕЛТА/. Нядоўгае пахаладанне чакаецца ў Беларусі ў канцы тыдня, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Атмасферныя франты цыклону, які перамяшчаецца праз паўночныя раёны краіны, прынеслі навальнічныя дажджы, пачало распаўсюджвацца няўстойлівае больш халоднае паветра з Балтыйскага мора.
"У канцы рабочага тыдня нас чакае ветранае надвор'е і нядоўгае пахаладанне. Але ўжо ў нядзелю на тэрыторыю краіны зноў распаўсюдзіцца цёплая паветраная маса з паўднёвага захаду Еўропы, і ў першы дзень ліпеня чакаецца гарачае надвор'е", - расказалі сіноптыкі.
У пятніцу, 28 чэрвеня, надвор'е ў Беларусі будзе вызначаць халаднаватая няўстойлівая паветраная маса, якая паступае з Балтыйскага мора. У многіх раёнах прагназуецца моцны парывісты вецер, па ўсходняй палове краіны пройдуць кароткачасовыя дажджы, у асобных раёнах прагрымяць навальніцы. Тэмпература паветра ноччу складзе 9-15 градусаў цяпла, днём - у асноўным плюс 15-21, па паўднёвым захадзе краіны паветра прагрэецца да 23 градусаў.
У суботу, 29 чэрвеня, халаднаватае надвор'е захаваецца. Уначы будзе пераважна без ападкаў, удзень у асобных раёнах рэспублікі магчымы невялікія кароткачасовыя дажджы. Ноччу месцамі па паўночным усходзе чакаецца парывісты вецер. Уначы будзе ад 7 да 12 градусаў цяпла, тэмпература ўдзень складзе ад плюс 16 па паўночным усходзе да 23 градусаў вышэй за нуль па паўднёвым захадзе краіны.
У нядзелю, 30 чэрвеня, надвор'е ў асноўным будзе вызначаць вобласць павышанага атмасфернага ціску. Будзе пераважна без ападкаў, толькі ў асобных раёнах па паўночным усходзе рэспублікі магчымы невялікія кароткачасовыя дажджы. Ноччу чакаецца 9-16 градусаў цяпла, днём у асноўным плюс 19-26, па захадзе краіны паветра прагрэецца да плюс 27-32 градусаў.
У панядзелак, 1 ліпеня, уначы будзе пераважна без ападкаў, удзень пад уплывам малаактыўнага атмасфернага фронту месцамі па рэспубліцы пройдуць кароткачасовыя дажджы з навальніцамі. Тэмпература ноччу складзе 12-19 градусаў вышэй за нуль, днём - плюс 27-34.-0-
