10 кастрычніка, Мінск /Кар. БЕЛТА/. У Беларусі завяршаецца падключэнне жыллёвага фонду да ацяплення. Аб гэтым карэспандэнту БЕЛТА паведаміла намеснік начальніка ўпраўлення камунальнай гаспадаркі і энергетыкі Міністэрства жыллёва-камунальнай гаспадаркі Святлана Цімошкіна.
"Жылфонд у поўным аб'ёме падключаны да ацяплення ва ўсіх рэгіёнах, за выключэннем Брэсцкай вобласці, дзе цяпер цяпло падаецца ў 78,5 працэнта жылых дамоў, і Гомельскай (97 працэнтаў). Верагодна, у бліжэйшыя дні гэтыя рэгіёны завершаць падключэнне жылых дамоў да ацяплення. Усе сацыяльныя аб'екты краіны падключаны ўжо", - адзначыла Святлана Цімошкіна.
Яна падкрэсліла, што адпаведныя рашэнні прымаюць мясцовыя выканаўчыя і распарадчыя органы ўлады. Ацяпленне ў жыллёвым фондзе, інтэрнатах, гасцініцах, навучальных установах уключаюць пры сярэднясутачнай тэмпературы паветра на працягу пяці сутак плюс 8 градусаў і ніжэй.
Пасля падачы цяпла ў жылфонд на чарзе грамадскія, адміністрацыйныя будынкі, прамысловыя прадпрыемствы. "Мясцовыя выканкамы прымаюць рашэнне аб пачатку падключэння да ацяплення і гэтай групы будынкаў. Гэта ў сваю чаргу дае права ўласнікам будынкаў канчаткова вызначыцца з датай уключэння ацяплення", - растлумачыла Святлана Цімошкіна.
Арганізацыі ЖКГ да ацяпляльнага сезона падрыхтавалі 1,83 млн куб.м драўнянага паліва, 10,7 тыс. т топачнага музуту ў якасці рэзервовага паліва для газавых кацельняў. Завершаны капітальны рамонт катлоў, капітальны і прафілактычны рамонт абсталявання кацельняў і цеплавых сетак, прафілактычны рамонт сістэм ацяплення і агляд цеплавых пунктаў.-0-