16 чэрвеня, Мінск /Кар. БЕЛТА/. З пачатку года ў Беларусі зарэгістраваны 132 лясныя пажары, паведаміў сёння журналістам кансультант упраўлення лясной гаспадаркі Міністэрства лясной гаспадаркі Аляксей Бойка, перадае карэспандэнт БЕЛТА.
"Пажаранебяспечны сезон у гэтым годзе прадаўжаецца. На 16 чэрвеня ўжо зарэгістраваны 132 выпадкі лясных пажараў агульнай плошчай 212,6 га. За аналагічны перыяд 2020 года колькасць лясных пажараў складала 784 выпадкі плошчай 6424,3 га", - адзначыў Аляксей Бойка.
Дзяржаўнай лясной аховай выяўлена 90 выпадкаў пажараў (68 працэнтаў ад агульнай колькасці), з іх 58 з выкарыстаннем сістэм і сродкаў дыстанцыйнага відэанагляду. Выяўленне лясных пажараў таксама ажыццяўлялася па аператыўных даных МНС - 20 выпадкаў (14,9 працэнта), з іх 7 - авіяцыяй.
Асноўнымі прычынамі ўзгаранняў традыцыйна з'яўляюцца неасцярожнае абыходжанне з агнём, выпальванне сухой травяністай расліннасці. "Былі пажары і ад удараў маланкай", - сказаў кансультант.
"Для тушэння лясных пажараў у сістэме Мінлясгаса ёсць 259 пажарна-хімічных станцый і 668 пунктаў проціпажарнага інвентару. Колькасць каманд і брыгад, якія ажыццяўляюць непасрэднае тушэнне ўзгаранняў у лясным фондзе, складае 4379 чалавек. Існуюць таксама розныя сродкі пажаратушэння: 543 пажарныя аўтамабілі, 27 усюдыходаў, 891 ёмістасць для падвозу вады, 1863 мотапомпы, 357 лесапажарных модуляў, 344 паветрадуўкі, 924 бензапілы, 2363 запальныя апараты, 12 907 ранцавых лясных апырсквальнікаў і 58 т рэчыва для барацьбы з ляснымі пажарамі. У сістэме Мінлясгаса таксама налічваецца 667 пажарна-назіральных вышак і мачтаў, абсталяваных 658 сістэмамі відэанагляду", - расказаў Аляксей Бойка.
Для ўзмацнення аховы лясоў ад пажараў на тэрыторыі ляснога фонду прадаўжаецца работа па ўкараненні аўтаматызаванай сістэмы сачэння і ранняга выяўлення лясных пажараў дыстанцыйнымі метадамі з выкарыстаннем сродкаў відэанагляду. "Сістэма дае магчымасць у аўтаматызаваным рэжыме ў кароткія тэрміны і пры мінімальных затратах ажыццяўляць сачэнне і ранняе выяўленне ўзнікаючых лясных пажараў, знаходзіць месцы і каардынаты ачагоў узгарання аж да 10-15 м", - падкрэсліў кансультант.
"Службовымі асобамі дзяржаўнай лясной аховы праводзіцца растлумачальная работа з насельніцтвам. Аднак праблема парушэння грамадзянамі патрабаванняў пажарнай бяспекі ўсё яшчэ застаецца актуальнай. Так, з пачатку года за невыкананне патрабаванняў па арт. 16.21 КоАП да адказнасці было прыцягнута 60 чалавек, за незаконнае выпальванне сухой расліннасці, траў на корані (арт. 16.40 КоАП ) - 3, а за развядзенне вогнішча ў забароненых месцах (арт. 16.41 КоАП) - 15", - дадаў Аляксей Бойка.
У выпадках пагрозы ўзнікнення лясных пажараў і ліквідацыі надзвычайнай сітуацыі на тэрыторыі ляснога фонду могуць уводзіцца абмежаванні і забароны на наведванне лясоў. "У гэтым годзе тройчы такія забароны ўводзіліся, яны дзейнічалі 3-4 дні. На сёння такіх забарон і абмежаванняў не ўведзена", - прадоўжыў кансультант.
Аляксей Бойка нагадаў: за парушэнне патрабаванняў па забеспячэнні пажарнай бяспекі ў лясах або на тарфяніках ці забароны на іх наведванне, што не прывяло да нанясення ўрону (ч. 1 арт. 16.21), прадугледжваецца штраф у памеры да 12 БВ, а за тыя ж парушэнні, але якія прывялі да знішчэння ці пашкоджання лесу або тарфянікаў, пагражае штраф да 30 БВ. За незаконнае выпальванне сухой расліннасці, траў на корані, а таксама ржышча і пажніўных рэшткаў на палях або непрыняцце мер па ліквідацыі выпальванняў на зямельных участках (арт. 16.40 КоАП) прадугледжаны штраф ад 10 да 30 БВ.-0-
