20 кастрычніка, Мінск /Кар. БЕЛТА/. У Беларусі пачаў практычнае функцыянаванне сумесны з Расіяй цэнтр падрыхтоўкі ВПС і войскаў ППА, паведаміў міністр абароны Беларусі генерал-лейтэнант Віктар Хрэнін на пасяджэнні сумеснай калегіі міністэрстваў абароны Беларусі і Расіі ў Маскве. Аб гэтым БЕЛТА паведамілі ў Міністэрстве абароны.
"На тэрыторыі Беларусі і Расіі вядзецца работа па стварэнні трох вучэбна-баявых цэнтраў сумеснай падрыхтоўкі падраздзяленняў узброеных сіл Беларусі і Расіі. Апрабацыю пытанняў арганізацыі нясення сумеснага баявога дзяжурства па проціпаветранай абароне ў рамках Адзінай рэгіянальнай сістэмы проціпаветранай абароны Беларусі і Расіі, праводзімую ў бягучым месяцы, ужо можна запісаць у актыў практычнага функцыянавання вучэбна-баявога цэнтра сумеснай падрыхтоўкі ВПС і войскаў ППА", - расказаў Віктар Хрэнін.
Паводле яго слоў, пасяджэнне сумеснай калегіі міністэрстваў абароны Беларусі і Расіі праведзена ў канструктыўным ключы. "У нас ёсць поўнае разуменне адказнасці за вырашэнне важных пытанняў, звязаных з забеспячэннем ваеннай бяспекі, мы строга прытрымліваемся агульных пазіцый па ўсіх актуальных пытаннях двухбаковага парадку дня, - адзначыў міністр. - Традыцыйна мы зацвердзілі сёння План двухбаковага супрацоўніцтва на 2022 год міністэрстваў абароны Беларусі і Расіі, які ўключае больш за 100 мерапрыемстваў. У ім максімальна ўлічаны прапановы расійскіх і беларускіх органаў ваеннага кіравання. У аснову пакладзены задачы па рэалізацыі раней прынятых сумесных рашэнняў, упор зроблены на практычныя мерапрыемствы. Упэўнены, што выкананне ўсіх прынятых рашэнняў дасць магчымасць падтрымаць на стратэгічным узроўні ваеннае і ваенна-тэхнічнае супрацоўніцтва паміж нашымі краінамі ў інтарэсах умацавання абараназдольнасці Саюзнай дзяржавы ў цэлым".-0-
