ДЗЯРЖОРГАНЫДЗЯРЖОРГАНЫ
Аўторак, 18 лютага 2020
Мінск Суцэльная воблачнасць +4°C
Усе навіны
Усе навіны
Грамадства
22 студзеня 2020, 11:58

У аэрапортах Беларусі ўзмоцнены санітарна-каранцінны кантроль пасажыраў

Фота з архіва
Фота з архіва

22 студзеня, Мінск /Кар. БЕЛТА/. У аэрапортах Беларусі ўзмоцнены санітарна-каранцінны кантроль пасажыраў. Такая інфармацыя размешчана на сайце Міністэрства аховы здароўя, паведамляе БЕЛТА.

Міністэрства аховы здароўя Беларусі сочыць за сітуацыяй з каранавірусам новага тыпу ў свеце, узмоцнены прафілактычныя мерапрыемствы па недапушчэнні яго распаўсюджвання ў краіне. Работа спецыялістаў ведамства накіравана на прафілактыку захворвання сярод тых, хто ўязджае ў Беларусь з краін з неспрыяльнай эпідсітуацыяй. Таксама вядзецца работа, у тым ліку праз тураператараў, па перасцярозе грамадзян, якія плануюць паездкі за мяжу.

"Каб аператыўна прыняць меры па недапушчэнні завозу віруса ў краіну, праводзяцца комплексныя мерапрыемствы ў Нацыянальным аэрапорце Мінск, - расказалі ў Міністэрстве аховы здароўя. - У аэрапортах арганізаваны санітарна-каранцінны кантроль пасажыраў з краін, у якіх выяўлена захворванне, у тым ліку з прымяненнем цеплавізійнага абсталявання". Спецыялісты РНПЦ эпідэміялогіі і мікрабіялогіі пастаянна сочаць за дынамікай развіцця эпідэмічнай сітуацыі ў свеце і гатовы да дыягностыкі ўзбуджальніка захворвання па метадычнай інструкцыі СААЗ.

Улады Кітая 31 снежня інфармавалі Сусветную арганізацыю аховы здароўя аб успышцы невядомай пнеўманіі ў горадзе Ухань. 7 студзеня кітайскія медыкі ўстанавілі ўзбуджальніка хваробы - каранавірус 2019-nCoV. Былі лабараторна тэсціраваны ўсе выпадкі захворвання з падазрэннем на новую пнеўманію. У краіне прымаюцца меры для ўдасканалення тэхналогій, якія дапамогуць больш аператыўна выяўляць новыя выпадкі заражэння. Па стане на 21 студзеня агульная колькасць пацверджаных выпадкаў 2019-nCoV складае 222, большасць з іх у Кітаі.

СААЗ накіравала ў бальніцы па ўсім свеце дырэктывы па прафілактыцы і барацьбе з інфекцыяй. Ва ўсіх краінах узмоцнена праверка падарожнікаў, якія прыбываюць з Кітая. Маючае адбыцца святкаванне кітайскага Новага года ў канцы студзеня 2020 года прывядзе да павелічэння аб'ёмаў паездак у Кітай і ўнутры краіны, што павялічыць верагоднасць магчымага распаўсюджвання інфекцыі. Пры паездках рэкамендуецца ўстрымацца ад наведвання месцаў масавага збору людзей, пазбягаць кантакту з тымі, у каго назіраюцца прыкметы прастуды, па магчымасці насіць маскі. Акрамя таго, неабходна рэгулярна мыць рукі і часова адмовіцца ад ужывання ў ежу недаваранага і недасмажанага мяса, паколькі мяркуецца, што заражэнне магло адбыцца ад мяса марскіх або сухапутных млекакормячых.

Каранавірусы - сямейства з больш як 30 вірусаў, якія былі ўпершыню вылучаны ў 1965 годзе. Яны небяспечныя для людзей, хатняй жывёлы, свіней, буйной рагатай жывёлы, птушак і здольны правакаваць пашкоджанне дыхальнай сістэмы, страўнікава-кішачнага тракту, нервовай сістэмы.

Плануецца, што 22 студзеня адбудзецца экстраннае пасяджэнне надзвычайнага камітэта СААЗ. Ён прыме рашэнне, ці ўяўляе ўспышка пнеўманіі, выкліканая новым каранавірусам, надзвычайную сітуацыю ў міжнародным маштабе, і, калі неабходна, распрацуе рэкамендацыі. У пасяджэнні прапанавана прыняць удзел толькі краінам, у якіх зафіксаваны выпадкі з прыкметамі гэтага віруса.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі