7 снежня, Гомель /Кар. БЕЛТА/. Вучэбны цэнтр Гомельскай абласной арганізацыі Беларускага Чырвонага Крыжа па аказанні першай дапамогі адкрыўся сёння ў Гомелі, перадае карэспандэнт БЕЛТА.
Гэта першы такі цэнтр у Беларусі, адзначыла на цырымоніі адкрыцця намеснік генеральнага сакратара БЧК Раманія Зорына. "Такі напрамак вельмі перспектыўны. Мы ўпэўнены, што такіх цэнтраў будзе больш. Паколькі яны важныя, мы бачым патрэбнасць у іх", - падкрэсліла яна.
Паводле слоў намесніка генеральнага сакратара БЧК, адкрыццё цэнтра дасць магчымасць абласной арганізацыі сканцэнтраваць у адным месцы ў тым ліку метадычную падтрымку, дасць магчымасць навучаць і валанцёраў, і супрацоўнікаў БЧК, і работнікаў розных прадпрыемстваў.
"Гомельская абласная арганізацыя ў цэлым вызначаецца ў Беларускім Чырвоным Крыжы інавацыйным падыходам. Вельмі многія пачынанні, якія БЧК падтрымлівае, стартуюць якраз у Гомелі", - дадала яна.
"У Беларускім Чырвоным Крыжы першая дапамога - адзін з галоўных напрамкаў дзейнасці. З адкрыццём цэнтра тэрыторыя добрых спраў пашыраецца. І яшчэ больш людзей змогуць прайсці навучанне па першай дапамозе", - падкрэсліла член Пастаяннай камісіі па адукацыі, навуцы, культуры і сацыяльным развіцці Савета Рэспублікі, старшыня Гомельскай абласной арганізацыі Беларускага Чырвонага Крыжа Ала Смаляк.
Як расказала спецыяліст абласной арганізацыі БЧК Аліна Юшкевіч, у цэнтры навучанне можна будзе прайсці па двух напрамках. "Адна інтэрактыўная пляцоўка - па першай дапамозе, другая - па доглядзе дома пажылых, цяжкахворых, інвалідаў розных узростаў. Асноўны акцэнт зроблены на практыку. На практычных занятках мы выкарыстоўваем сімуляцыйныя манекены, напрыклад, для адпрацоўкі сардэчна-лёгачнай рэанімацыі людзей розных узростаў: дарослых, падлеткаў, дзяцей. Ёсць манекены для адпрацоўкі прыёмаў пры непраходнасці дыхальных шляхоў. Ёсць і перавязачны матэрыял, вучэбны матэрыял", - пералічыла спецыяліст. Паводле яе слоў, слухач курса будзе выходзіць пасля навучання з поўнай упэўненасцю ў тым, што ён не разгубіцца ў непрадбачанай сітуацыі і зможа пры неабходнасці аказаць першую дапамогу.
Аліна Юшкевіч дадала, што ў групах будзе да 20 чалавек. Як было адзначана, курс першай дапамогі Беларускага Чырвонага Крыжа прызнаны ў Беларусі і яго праграма цалкам адпавядае патрабаванням міжнароднай супольнасці. Тыя, хто прайшоў трэнінгавы курс у вучэбным цэнтры, атрымаюць сертыфікаты еўрапейскага ўзору.-0-
