21 студзеня, Мінск /Кар. БЕЛТА/. Школа павінна дапамагчы вучням правільна зразумець важныя падзеі Вялікай Айчыннай вайны, заявіла ў час круглага стала ў прэс-цэнтры БЕЛТА кансультант упраўлення сацыяльнай, выхаваўчай і ідэалагічнай работы Міністэрства адукацыі Ларыса Емяльянчык.
"Выхаванне моладзі на прыкладзе ваенных і працоўных подзвігаў народа ў гады Вялікай Айчыннай вайны заўсёды разглядалася педагогамі ўстановы адукацыі як адзін з прыярытэтных напрамкаў выхаваўчай работы. Фарміраванне каштоўнасных адносін да гістарычнага мінулага - аснова грамадзянска-патрыятычнага і духоўна-маральнага выхавання маладога пакалення, - сказала Ларыса Емяльянчык. - Кожнае новае пакаленне па-свойму асэнсоўвае старонкі ваеннай гісторыі. Школа павінна дапамагаць сваім выхаванцам правільна зразумець важныя падзеі ваеннага ліхалецця, захаваць памяць пра вялікі подзвіг нашага народа. Вялікі выхаваўчы патэнцыял закладзены непасрэдна ў вучэбнай дзейнасці".
На жаль, сёння мы сутыкаемся са спробамі перапісаць гісторыю ў кан'юнктурных палітычных мэтах, абясцэніць уклад савецкага народа ў сусветную Перамогу над фашызмам. Асновай у супрацьстаянні фальсіфікацыям з'яўляецца гістарычная навука. "Вывучэнню Другой сусветнай вайны ва ўстановах агульнай сярэдняй адукацыі ўдзяляецца вялікая ўвага. Праграмамі па вучэбных прадметах "Чалавек І свет. Мая Радзіма - Беларусь", "Сусветная гісторыя", "Гісторыя Беларусі" прадугледжана вывучэнне гэтых пытанняў у IX і X класах. Пытанні па гісторыі Вялікай Айчыннай вайны таксама ўключаны ў білеты для правядзення абавязковага выпускнога экзамену па навучальным прадмеце "Гісторыя Беларусі" (XI клас). У 2020/2021 навучальным годзе пачалі выкарыстоўвацца абноўленыя праграмы і дапаможнікі па прадметах "Сусветная гісторыя", "Гісторыя Беларусі" для X класа, а да 2021/2022 навучальнага года будуць абноўлены для XI класа, у змест якіх будуць уключаны найноўшыя даследаванні гістарычнай навукі", - адзначыла кансультант упраўлення.
Падрабязна азнаёміцца з гістарычнымі падзеямі Другой сусветнай вайны, гераізмам і мужнасцю савецкага народа вучні могуць на факультатыўным занятку "Вялікая Айчынная вайна савецкага народа (у кантэксце Другой сусветнай вайны)" у X класе. Цяпер абноўлены вучэбна-метадычны дапаможнік па гэтым курсе.
Асабліва значным і маштабным стала правядзенне ва ўстановах адукацыі мерапрыемстваў грамадзянскай, героіка- і ваенна-патрыятычнай накіраванасці, аб'яднаных тэмай Вялікай Перамогі. "У рамках юбілейнай даты ва ўстановах адукацыі праводзілася рэспубліканская акцыя "Беларусь памятае", якая аб'яднала больш за 450 тыс. навучэнцаў усёй краіны і мерапрыемствы рэспубліканскай героіка-патрыятычнай акцыі "Вялікай Перамозе - 75!", у якіх удзельнічаў практычна кожны школьнік і студэнт. У 2020 годзе ўдзельнікамі акцыі ў рамках рэспубліканскага конкурсу "Вайны свяшчэнныя старонкі навекі ў памяці людской" праводзілася пошукавая работа па даследаванні жыцця і дзейнасці ўдзельнікаў Вялікай Айчыннай вайны, партыйных дзеячаў, партызан, падпольшчыкаў, якія звязалі сваё жыццё з прафесіяй педагога", - падкрэсліла Ларыса Емяльянчык.
Яна дадала, што 104 установы адукацыі Беларусі носяць імёны асоб, якія праявілі сябе ў ратнай справе і ўнеслі неацэнны ўклад у агульную Перамогу ў Вялікай Айчыннай вайне.-0-
