26 чэрвеня, Мінск /Кар. БЕЛТА/. Прыярытэтам у забеспячэнні дэмаграфічнай бяспекі павінна стаць павышэнне ўзроўню жыцця сем'яў. Дзейсную дапамогу ў вырашэнні гэтай задачы мясцовым уладам павінен аказваць дэпутацкі корпус. Такое меркаванне выказаў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў на пасяджэнні Наваполацкага гарвыканкама, паведамілі БЕЛТА ў прэс-службе верхняй палаты беларускага парламента.
Пасяджэнне Наваполацкага гарвыканкама прысвячалася пытанням дэмаграфічнай бяспекі і папярэджанню гібелі людзей ад знешніх прычын. Сяргей Рачкоў падкрэсліў важную ролю парламентарыяў у рэалізацыі дзяржаўнай праграмы "Здароўе народа і дэмаграфічная бяспека Беларусі на 2016-2020 гады. "Важнейшая задача забеспячэння дэмаграфічнай бяспекі - павелічэнне нараджальнасці і працягласці жыцця. Прыярытэтным у гэтым пытанні павінна стаць паляпшэнне ўмоў, ўзроўню і якасці жыцця сем'яў. Дэпутацкі корпус павінен аказваць у гэтым дзейсную дапамогу мясцовым органам улады і грамадскім арганізацыям", - адзначыў сенатар. Ён дадаў, што ад эфектыўнасці гэтай работы залежыць паспяховае развіццё краіны.
У час рабочай паездкі Сяргей Рачкоў сустрэўся са старшынёй Наваполацкага гарвыканкама Дзмітрыем Дзямідавым. "Абмяркоўвалася сацыяльна-эканамічнае развіццё Наваполацка, эпідэміялагічная сітуацыя, ход электаральнай кампаніі ў горадзе", - расказалі ў прэс-службе. Акрамя таго, у Наваполацкім гарвыканкаме Сяргей Рачкоў правёў прамую тэлефонную лінію.
Сенатар пабываў таксама ў Полацкім дзяржаўным універсітэце. У размове з рэктарам Дзмітрыем Лазоўскім парламентарый закрануў пытанні развіцця міжнародных сувязей і нарошчвання экспарту адукацыйных паслуг, правядзення ўступнай кампаніі, дадалі ў прэс-службе.-0-
