26 лістапада, Мінск /Кар. БЕЛТА/. На парадку дня ў Беларусі і Расіі застаецца важнае для абедзвюх краін пытанне зняцця абмежаванняў на перамяшчэнне на беларуска-расійскай граніцы. Аб гэтым паведаміў журналістам міністр замежных спраў Беларусі Уладзімір Макей сёння па выніках сумеснага пасяджэння калегій міністэрстваў замежных спраў Беларусі і Расіі, перадае карэспандэнт БЕЛТА.
Кіраўнік беларускага МЗС падкрэсліў: "На парадку дня застаецца важнае для нашых краін пытанне зняцця абмежаванняў на перамяшчэнне на беларуска-расійскай граніцы. Нам ужо ўдалося дамовіцца аб пэўных паслабленнях для шэрага катэгорый грамадзян і аб актывізацыі авіязносін паміж дзвюма краінамі".
Пры гэтым ён выказаў надзею, што ўзгодненая работа па далейшай нармалізацыі ўсіх відаў транспартных зносін пры безумоўным выкананні мер прафілактыкі дасць свае вынікі.-0-
