Навіны сюжэта
""Марафон адзінства" ў Беларусі "
4 студзеня, Салігорск /Кар. БЕЛТА/. У час "Марафону адзінства" ў падземным аддзяленні Рэспубліканскай бальніцы спелеалячэння ў Салігорску прайшоў канцэрт Прэзідэнцкага аркестра Рэспублікі Беларусь, перадае карэспандэнт БЕЛТА.
Віртуозы Прэзідэнцкага аркестра выступілі ва ўнікальным падземным комплексе, размешчаным на глыбіні 420 метраў. Бальніца з'яўляецца адзінай дзеючай установай у свеце, якая практыкуе немедыкаментозны метад лячэння з прымяненнем падземнай спелеатэрапіі ў калійных рудніках.
"Быць у Салігорску, быць на "Беларуськаліі" і не спусціцца пад зямлю, напэўна, было б няправільна. Гэта спелеалячэбніца - унікальнае месца. Для мяне было адкрыццём, што ў шахце ёсць рэспубліканская бальніца. Сюды прыязджаюць людзі нават з-за мяжы. І сёння сярод слухачоў канцэрта ёсць людзі не толькі з Беларусі, але і з Расіі, з іншых краін", - расказаў журналістам прадстаўнік рабочай групы па арганізацыі і правядзенні "Марафону адзінства", дырэктар Палаца Рэспублікі Максім Прыхадоўскі.
Галоўны дырыжор і мастацкі кіраўнік аркестра Віталь Кульбакоў адзначыў, што выступленне ў спелеалячэбніцы не стала складанасцю для калектыву. "Наверсе, на тэрыконах мы пабывалі ўжо на 20-годдзе Прэзідэнцкага аркестра і 25-годдзе Палаца Рэспублікі. Там праходзілі здымкі. Але сённяшні канцэрт, вядома, цікавая для нас практыка. Артысты крыху баяліся, але калі мы спусціліся і ўбачылі, як тут усё добра арганізавана, то ўсе страхі зніклі. А яшчэ тут цудоўная акустыка", - расказаў Віталь Кульбакоў.-0-
Падпісвайцеся на нас у
